Vizita "ad Limina Apostolorum" e ipeshkvijve katolikë të rajonit Verilindje të Brazilit
në Vatikan
Që nga fillimi i muajit shtator, Benedikti XVI është duke prit në Kastelgandolfo ipeshkvijtë
katolikë të Rajonit Verilindje 3 të Brazilit në vizitën e tyre ad Limina Apostolorum.
Nga relacionet baritore që i komunikohen Papës e Kuries Romake, del në pah fotografia
e një zone të Brazilit, ku vërehet një vështirësi e veçantë ekonomike, së cilës duhet
shtuar edhe rreziqet e shekullarizimit, që shkaktojnë rritjen e indiferencës fetare
dhe shpërbërjen e indit shoqëror, madje edhe në një komb me traditë të lashtë të krishterë.
Këtë konfirmon imzot Ottorino Assolari, ipeshkëv i dioqezës së Serrinha në Shtetin
Bahia të Brazilit. “Konteksti shoqëror i rajonit tonë, përveç fenomenit të
përbashkët që ekziston në mbarë Brazilin, siç është për shembull globalizimi, relativizmi
apo subjektivizmi fetar - që kanë errësuar vlerën e aspektit fetar në përgjithësi
e jetës së krishterë në veçanti - situata shoqërore lokale, sipas mendimit tim, karakterizohet
nga një nënzvhillim kulturor, nga një pasiguri ekonomike e nga shpërbërja e familjes.
Kemi shumë familje që ndahet apo largohet, sepse të rinjtë e burrat shkojnë larg shtëpie
në kërkim të një pune e shpesh nuk kthehen më. Prandaj mungon transmetimi i vlerave
njerëzore, etike e shpirtërore nga një brez tek tjetri. Më tej nuk mund të harrojmë
praninë e madhe e të fuqishme të mjeteve të komunikimit e ndikimit që janë në jetën
e qytetarëve. Mediat depërtojnë e pushtojnë familjet e në realitet janë gati mjeti
i vetëm i formimit të mentalitetit, të mendimit e të bindjeve. Një problem tjetër
që kemi është ai sekteve fetare, që janë të shumta, e të cilat tërheqin shumë njerëz
me premtime të një mirëqenie materiale e me mesazhe premtuese e joshëse. Besoj se
gjendja në vend është mjaft e rëndë, mirëpo Kisha që është e vetëdijshme për këtë,
dhe çka është e rëndësishme, ajo po orvatet ta përmirësojë atë duke insistuar mbi
cilësinë e jetës së krishterë përmes një formimi të përshtatshëm, në mënyrë që besimtarët
tanë të bëhen për shoqërinë tonë siç është tharmi për brumë”.