Shpresa për paqe: editorial i atë Federiko Lombardit
Rifillimi i bisedimeve për Lindjen e Mesme në Uashington, javës së kaluar, zgjoi në
të gjithë botën shpresa të mëdha për paqe. Pikërisht këtij argumenti ia kushton komentin
javor, drejtori i Sallës së Shtypit të Vatikanit, atë Federiko Lombardi, njëkohësisht,
drejtor i përgjithshëm i Radio Vatikanit: “Ndërsa fillonin në Uashington bisedimet
e drejtpërdrejta ndërmjet izraelitëve dhe palestinezëve, nën patronazhin e Administratës
amerikane, në Kastel Gandolfo, Papa priste presidentin e Izraelit, Shimon Peres, duke
i shfaqur shpresën e gjallë të tij dhe të krejt Kishës, për suksesin e negociatave
për “një paqe të qëndrueshme në Tokën Shenjte e në krejt rajonin”, mbi bazën e “një
marrëveshjeje, që respekton aspiratat e ligjshme të të dy popujve”. Askush
s’mund ta fshehë vështirësinë e kësaj ndërmarrjeje, pas shumë përpjekjesh të dështuara
e në një kontekst, ku shumë punojnë – jo vetëm me fjalë, por edhe me dhunë – për ta
çuar procesin drejt falimentimit. Por, rruga e dialogut mbetet e vetmja për të ndërtuar
me largpamësi të ardhmen në paqe e në drejtësi, që në të vërtetë, e duan të gjithë,
pavarësisht se vuajtjet dhe urrejtja ua kanë errësuar pamjen. Është rruga që Kisha
ka këshilluar gjithnjë me durim e këmbëngulje. Është rruga që Papa Benedikti XVI shpalli
në udhëtimin e tij të paharrueshëm në Tokën Shenjte, vitin e kaluar, ripohuar me guxim
edhe pas krizës së tmerrshme të Gazës. Për këtë guxim plot durim dëshmon edhe dedikimi
i bukur, që presidenti Peres e ka shkruar personalisht, për dhuratën ofruar Papës,
një menorah argjendi, simbol i Izraelit: “Shenjtërisë së Tij, Papës Benedikti XVI,
Bariu që impenjohet për të na çuar në fushat e bekimeve e në fushat e paqes. Me vlerësim
të madh”. Pra, impenjimit të politikanëve u shtohet impenjimi i autoriteteve të mëdha
morale dhe fetare. A do të vijë më në fund paqja? Të gjithë duhet të impenjohemi për
këtë”.