Mesazh i Papës për katolikët në Azi: dëshmoni se është bukur të jesh i krishterë
(01.09.2010 RV)Kisha në Azi të dëshmojë gjithnjë e më shumë se të jesh i krishterë
është bukur: ky është thelbi i mesazhit të Papës për Kongresin e laikëve katolikë
në Azi, i cili do të vazhdojë në Seul të Koresë së Jugut, deri të dielën. Mesazhi
u lexua sot paradite nga Nunci Apostolik në vend, imzot Osvaldo Padila. Kontinenti
aziatik, nënvizon Benedikti XVI, përmban dy të tretat e popullsisë botërore dhe është
djepi i feve e i traditave të mëdha shpirtërore. Aktualisht, ai po zhvillohet shumë
ekonomikisht dhe po shndërrohet si asnjëherë nga pikpamja shoqërore. Pikërisht në
këtë kontekst, katolikët janë të thirrur të jenë shenjë e premtim i atij bashkimi,
që e bën të mundur vetëm Krishti. “Popujt e Azisë kanë nevojë për Jezu Krishtin
e Ungjillin e tij”, kujton më pas Ati i Shenjtë, duke cituar Këshillimin apostolik
post-sinodal “Ecclesia in Asia” (Kisha në Azi), nënshkruar nga Gjon Pali II, në vitin
1999. Për këtë, vazhdon, të shoqëruar nga formimi i shëndoshë shpirtëror e katekistik,
ata duhet të inkurajohen të bashkëpunojnë aktivisht, jo vetëm për të krijuar bashkësitë
e krishtera lokale, por edhe për të gjetur rrugë të reja për Ungjillin, në çdo sektor
të shoqërisë. Në veçanti, Papa ndalet në rëndësinë e dëshmisë së të vërtetës ungjillore
në jetën bashkëshortore e familjare, në mbrojtjen e jetës nga fillimi deri në fund,
në kujdesin për të varfërit, në faljen e armiqve, në praktikimin e drejtësisë e të
solidaritetit në vendet e punës. “Numri gjithnjë në rritje i laikëve të impenjuar,
të përgatitur dhe entuziastë është shenjë shprese e jashtëzakonshme për të ardhmen
e Kishës në Azi”, vazhdon Benedikti XVI, duke falenderuar për punën e shkëlqyer të
katekistëve, lëvizjeve apostolike dhe kishtare: secili, në fushën e vet, çon drejt
“takimit më të thellë me Zotin e Ringjallur”, nxit dinjitetin njerëzor dhe dëshmon
universalitetin e mesazhit ungjillor. Duke nënvizuar rolin e pazëvendësueshëm të besimtarëve
laikë në misionin e Kishës, Papa këshillon çdo katolik të ndjekë shembullin e Shën
Palit Apostull, për t’u çuar të tjerëve të vërtetën, gëzimin dhe bukurinë e Jezusit,
pa u shkurajuar para vështirësive. Ati i Shenjtë ia beson Kongresin ndërhyrjes amnore
të Zojës.