Польшча адзначае дзень заснаваньня “Салідарнасьці”
На мерапрыемствы з нагоды 30-годзьдзя “Салідарнасьці” запрошаныя 2,5 тыс. чалавек,
між іншым, прэзыдэнт Браніслаў Камароўскі й прэм’ер-міністар Дональд Туск. Урачыстасьць
адбываецца ў Гдыні,як паведамляе"polskieradio".Гістарычны лідэр “Салідарнасьці” Лех
Валэнса адмовіўся ад удзелу ва ўрачыстасьцях. У Гдыню завітаюць прадстаўнікі прафсаюзных
арганізацый з усяго сьвету, у тым ліку зь Беларусі. Амбасадар ЗША у Польшчы Лі Фэйнштэйн
зачытае адмысловы зварот ад прэзыдэнта ЗША Барака Абамы. Прафсаюзны рух “Салідарнасьць”
узьнік пасьля хвалі пратэстаў рабочых у жніўні 1980 году. Тагачасныя ўлады ПНР былі
вымушаныя сесьці за стол перамоваў, і ў выніку ў апошнія дні жніўня ў Шчэціне, Гданьску
й Ястшэмбі былі падпісаныя пагадненьні пра ўтварэньне незалежнага прафсаюзу. Праз
тры месяцы ўлады зарэгістравалі “Салідарнасьць”. У той час у шэрагах арганізацыі было
каля 10 млн. чалавек, гэта каля 80% усіх польскіх рабочых. Сёньня прафсаюз “Салідарнасьць”
аб’ядноўвае каля 700 тыс. чалавек.