Shembëlltyrat e Jezusit e dënojnë mburrjen dhe indiferencën.
(29.08.2010 RV)Sot do të ndalemi tek dy nga shembëlltyrat më të njohura të
Jezusit, që dënojnë qartë mburrjen e indiferencën, dy prirje tejet të njohura të njeriut,
sidomos në kohët e ashtuquajtura moderne. Shembëlltyra e “Njeriut të pasur e
Lazrit skamnor” është qortim për të pasurit që, ndonëse në dukje nuk janë njerëz të
këqij, i shikojnë me indiferencë nevojat e të varfërve, etjen e tyre, urinë, plagët.
Madje shpesh verbohen deri në atë masë, sa të mos i shikojnë fare. Pa menduar se i
pret dënimi në Hades, në vendin e mundimeve, ku nuk mund t’i ndihmojë askush e prej
nga nuk do të mund t’u dëgjohet më zëri, qortues për të tjerët. Klithma, që del nga
fundi i ferrit, nuk mund të arrijë në veshët e të gjallëve. Do të ishin thua më të
mirë, më pak egoistë, po ta dëgjonin? Krishti na kujton se njeriu nuk ka nevojë për
zëra, dalë nga gropa e flakëve. Mjafton të dëgjojë zërin e Zotit, që i flet nga Shkrimi
Shenjt. E në se nuk ia vënë veshin këtij zëri, shpirtrat e humbura çirren më kot…Qenë
paralajmëruar për atë që i priste. Zëri i Zotit u pati kujtuar vazhdimisht se pasuritë
s’vlejnë gjë në ditën e zemërimit; atë ditë, vetëm drejtësia të shpëton nga vdekja
(Fu 11,4). Ky, mësimi që duhet nxënë nga shembëlltyra e “Njeriut të pasur
e Lazrit skamnor”. Nga shembëlltyra tjetër, ajo e farizeut dhe e tagrambledhësit,
Jezusi u flet atyre, që e mbajnë veten të drejtë e i shikojnë të tjerët me përbuzje,
si të padrejtë. “Dy njerëz u ngjitën në tempull për t’u lutur: njëri ishte farize,
tjetri, tagrambledhës. Farizeu, qiri në këmbë, lutej kështu: “Të falënderoj, o Hyj,
që nuk jam si njerëzit tjerë…. Agjëroj dy herë në javë, jap të dhjetën e krejt fitesës…
Kurse tagrambledhësi zuri vend në fund të tempullit, e as sytë nuk guxonte t’i çonte
drejt qiellit, por rrihte kraharorin e vet e thoshte, ashtu pa zë: “O Hyj, kij mëshirë
për mua, mëkatarin!”. Mjer ai, që nuk e njeh vetveten! Jezusi nuk e dënon farizeun,
sepse është i tillë. E dënon nga që, duke besuar se është i drejtë, mjaftohet të falënderojë
Zotin për të mirat, të cilat i ka prej Tij, duke i kujtuar se nuk është cub, i padrejtë,
kurorëshkelës, si tagramledhësi, aty pranë. Por as që i shkon në mendje të kërkojë
falje. Kështu, duke menduar se nuk është mëkatar, si të tjerët, ai nis të mburret
për cilësitë e veta morale e ta përbuzë tjetrin: verbohet deri në atë masë, sa të
e mos kuptojë se pikërisht mburrja për drejtësinë e vet e përbuzja për tjetrin e bëjnë
mëkatar para syve të Zotit. Thotë Shkrimi Shenjt: “Aty ku hyn mburrja, hyn edhe poshtërsia!”
(Fu 11,2). Ndërsa tjetri, duke i pranuar përvujtërisht mëkatet e veta,
ndjen nevojën t’i lutet Zotit të ketë mëshirë për të. Sepse e dëgjon zërin e Zotit,
që i flet nga Shkrimi Shenjt e i thotë: “Mos të mbushet mendja se je i urtë, mos e
mbështet shpresën në mençurinë tënde... Në të gjitha shtigjet tua, çoje mendjen tek
Hyji. E ai do t’i rrafshojë udhët tua. Mos të mbushet mendja se je i urtë. Kij frikë
e largoju nga e keqja. Nderoje Zotin në të mira tua e falja atij frytet e para të
djersëve tua” (Fu 3,5-8,9). Dëgjuesve të tij, të shkandulluar për atë që
po u dëgjonin veshët, sepse, sipas Ligjit, kishin nderim të madh për farizejtë, ndërsa
i urrenin tagrambledhësit, Jezusi u përgjigjet me autoritetin e vet hyjnor: “Unë po
ju them: tagrambledhësi, jo farizeu, do të kthehet në shtëpi i shfajsuar”. E kështu
Krishti na kujton se njeriu shëlbohet jo kur i beson vetvetes, jo kur mburret për
meritat e veta, por vetëm e vetëm për hir të mëshirës së Zotit. “Kush krenohet, do
të përulet, e kush përulet, do të lartohet”. Ky është mësimi që nxëmë nga kjo shembëlltyrë,
një nga mësimet më të çmuara të Ungjillit.