Çelësi i fjalëve të Kishës: fjalët e Nënë Terezës përherë aktuale
Të dashur dëgjues, “Çelësi i fjalëve të Kishës” arriti në emisionin e 64-t, pikërisht
në ditën kur kremtojmë 100-vjetorin e lindjes së Nënë Terezës. Prandaj, nuk mund të
mos ia kushtojmë asaj këtë emision, duke u larguar paksa nga tradita e tij, por duke
përfshirë në të fjalët e dashura për të Lumen shqiptare, si feja e dashuria. Vërtet,
jeta e Nënë Terezës është fe, që shëndërrohet në gjeste konkrete, me të cilat motra
e vogël u fitoi zemrat edhe hinduistëve e myslimanëve të Kalkutës.
E lemë
pra të flasë atë vetë, duke zbuluar fjalët më pak të njohura të magjisterit të saj
të veçantë. Si këto për shembull: “Shpresoj të arrij t’i kthej njerëzit në rrugën
e Zotit. E me këtë, nuk mendoj kthimin nga një fe në tjetrën. Ajo që shpresoj është
kthimi i zemrave. Nëse, duke qëndruar me Zotin, e pranojmë në jetën tonë, atëherë
po, kthehemi vërtet nga Ai. Bëhemi hinduistë më të mirë, myslimanë më të mirë, katolikë
më të mirë…”. Një frazë e tillë mund të çudisë ndokënd. Nënë Tereza paskësh
qenë “relativiste”? Sigurisht që jo. Nëse murgesha shqiptare është kaq familjare në
Indi e nderohet nga të gjithë, edhe nga hinduistët e myslimanët, do të thotë se “është
bërë gjithçka për të gjithë”. E jo në emër të ndonjë universalizmi abstrakt, por në
emër të Ungjillit të Jezu Krishtit. Shumë personave Nënë Tereza u ka ndryshuar
jetën. Ndoshta e kanë takuar për pesë minuta, por aq ka mjaftuar për ta parë jetën
e punën e tyre me sy tjetër. Ky është sekreti i së Lumes shqiptare: aftësia për ta
dëshmuar Zotin përmes bamirësisë e dashurisë, kaq konkretisht e kaq hapur, sa të fitojë
zemrat e njerëzve të çdo feje. Nënë Tereza, që nuk ishte teologe, ia mbërriti qëllimit
atje ku shumë përpjekje për inkulturimin e mesazhit të krishterë kanë shkuar kot.
“Me dëshminë e jetës së vet – pati thënë Papa Gjon Pali II ditën e lumnimit
të saj – Nënë Tereza u kujton të gjithëve se misioni ungjillëzues i Kishës kalon përmes
bamirësisë, ushqyer nga lutja e nga dëgjimi i Fjalës së Zotit. Emblematik i këtij
stili misionar është imazhi i së Lumes së re ndërsa shtrëngon, në njërën dorë, dorën
e një fëmije, e në tjetrën, Rruzaren”. Kundrim e veprim, mistikë dhe bamirësi:
është përzierja e këtyre dy përmasave, të cilat në jetën e Nënë Terezës marrin formë
origjinale, që i lejuan asaj të hynte në gjirin e një populli dhe të një kulture,
që për një kohë të gjatë (e edhe tani) e konsideron shpesh krishterimin si diçka të
huaj. Në një intervistë, në vitin 1997, kryeipeshkvi i Kalkutës, imzot Henri D’Suza
pati thënë: “Unë besoj se për të dashur indianët, e sidomos të gërbulurit, ata
që vdesin rrugëve, që janë plot varrë, që e lenë veten në dorë të fatalizmit, duhet
të bëhesh indian. Nënë Tereza u bë për njëzet vjet. E në këtë proces, duke u bërë
si indiane, pra duke mbajtur një lloj distance e duke u mbyllur në kërkimin individual,
si kundruese, si mistike, arriti të tregojë karakteristikën e krishterë të mëshirës
e të dashurisë për tjetrin. Ishte sinteza! Edhe Gandi pati arritur të bashkonte distancën
me bamirësinë, për këtë Nënë Tereza më thoshte se e donte shumë”. Është po
kjo arsyeja, për të cilën motrat me sari bardhë e blu arrijnë të qëndrojnë në vende
ku nuk i duan murgeshat e krishtera: nga Gaza në Afganistan, nga Kuba në Nepal, e
kështu me radhë… Vetë Nënë Tereza ka thënë: “Nuk kemi absolutisht asnjë vështirësi
për të punuar në vende me fe të ndryshme. I trajtojmë të gjithë si bij të Zotit e
tregojmë respekt të madh për ta”. Dëshmia e saj lë shenjë tek njerëz nga më
të ndryshmit. Mjafton të shohim në sy vullnetarët, që vazhdojnë të frekuentojnë shtëpitë
e Misionareve të Bamirësisë. Është mrekullia për të cilën, shumë të rinj perëndimorë,
të lodhur nga dhjami i pasurisë e nga varfëria shpirtërore e shoqërisë, gjetën forcën
e zjarrin, që u djeg zemrën për të tjerët.