Nënë Tereza shembull i shkëlqyer i dashurisë së krishterë
Nënë Tereza, shembull i shkëlqyer i dashurisë së krishterë, ka thënë një fjalë të
urtë, një fjalë ari, që meriton të kujtohet gjithnjë e prej të gjithëve: "E keqja
më e madhe është indiferenca!". Ta analizojmë për një çast kuptimin e kësaj fjale:
indiferencë do të thotë të mos anosh as nga njëra anë, as nga tjetra, kur nuk të
gjallëron kurrfarë ndjenje, nuk ke kurrfarë simpatie, nuk të prekë asnjë rrethanë,
asnjë ngjarje. Indiferenca, në një farë mënyre, është paradhoma e egoizmit; ndërmjet
njërës e tjetrës, porta mbetet gjithnjë e hapur. Mund të shtojmë se indiferenca është
shfaqje e dukshme e vetë egoizmit, e si e tillë, e kundërta e dashurisë. Ka njerëz
që nuk ngurrojnë ta pranojnë haptazi se janë indiferentë: e këta duhen vlerësuar së
paku për sinqeritetin. Por ka edhe më keq. E janë ata, që e mbajnë veten të krishterë,
që të paraqiten si të krishterë e janë më indiferentë se vetë indiferentët. Sigurisht,
janë më të rrezikshmit: të quhesh i krishterë e të jesh indiferent, don me thënë të
jesh egoist, të mendosh vetëm për vetvete, të duash me një dashuri të rreme, të përkrahësh
njëlloj si të mirën, si të keqen: Sipas këtyre soj njerëzish, duhet harruar edhe
që Jezusi në Ungjill thekson se është e pamundur të jesh njëkohësisht me Zotin e me
shejtanin. Kush është indiferent, nuk mund ta dojë të afërmin e dihet mirë që kush
nuk e don të afërmin, s'ka si ta dojë as Zotin. Prandaj fjala e artë e Nënë Terezës
ka vlerë të dorës së parë jo vetëm në këndvështrimin e besimit të krishterë, por
edhe në këndvështrime të tjera. E nënvizojmë këtë, sepse shpesh herë egoizmi dashurimohues
kërkon të vërë shenjën e barazimit ndërmjet indiferencës e karakterit, duke u kënaqur
me shpjegimin: "Ç' t'i bësh, ashtu ka lindur!". E ky s'është tjetër, veçse egoizëm
i pastërt. E, vlen të theksohet edhe një gjë tjetër që ka lidhje me atë, të cilën
Nënë Tereza e quan e keqja, apo sëmundja më e madhe: indiferenca mund të jetë edhe
nëna e egoizmit. E kjo sepse indiferenca fillimisht e pushton shpirtin njerëzor, pastaj
e shkëput pak nga pak nga çdo ndjenjë e mirë ndaj të tjerëve, për ta mbyllur më në
fund, në kafazin e vetvetes, të egoizmit. Ka vetëm një ilaç për këtë sëmundje të
madhe: zbatimi i çiltër, i vazhdueshëm, misionar i atyre pak fjalëve të Jezu Krishtit,
që përbëjnë bazat e krishterimit: "Duaje të afërmin si vetveten!".