Audienca e përgjithshme: thirrje për t’i dhënë fund dhunës në Somali e, në katekizëm,
ftesë për të kërkuar të Vërtetën, në gjurmët e Shën Agostinit.
(25.08.2010 RV)Sot, gjatë audiencës së përgjithshme, mbajtur në Kastel Gandolfo,
Benedikti XVI bëri thirrje për t’i dhënë fund dhunës në Somali. Në katekizëm, i nxiti
besimtarët t’i kenë gjithnjë përkrah shenjtorët, si shokë në udhën e fesë. Kujtoi,
përsëri, edhe Shën Agostinin, duke u ndaluar tek një nga tiparet e tij kryesore: kërkimi
i vazhdueshëm i së Vërtetës. Mendimi i Papës sot shkoi në Mogadisho, dje teatër
i një kërdie të re, që iu shtua masakrave të përditshme: “Jam pranë familjeve
të viktimave dhe gjithë atyre që, në Somali, vuajnë për shkak të urrejtjes e të situatës
së paqëndrueshme. Uroj që, me ndihmën e bashkësisë ndërkombëtare, të mos kursehen
përpjekjet për të rivendosur respektin për jetën dhe të drejtat e njeriut”. Në
katekizëm, Benedikti XVI i ftoi besimtarët t’i kenë shenjtorët ‘shokë udhe’ në shtegun
e jetës së krishterë. Secili besimtar, pohoi Papa, duhet ta ketë një shenjt pajtor
e mik, që ta ndjejë pranë në lutje, t’i drejtohet për ndërmjetësim, por edhe të ecë
në gjurmët e tij, duke u përpjekur për t’i përngjarë. Prandaj duhen njohur shumë shenjtorë,
duke nisur nga shenjti që na dhuroi emrin. Ftesë kjo, e Papës, për të lexuar jetët
e shenjtorëve, me të cilat është tejet e pasur letërsia kishtare: “Duhet
të jeni të sigurt se ata do të bëhen udhëheqës të mirë e do t’ju prijnë drejt Zotit,
do t’ju ndihmojnë ta doni më fort e të rriteni gjithnjë më shumë si njerëz e si të
krishterë. Siç e dini, edhe unë jam i lidhur në mënyrë të posaçme me disa figura shenjtorësh:
ndërmjet tyre, Shën Jozefi e Shën Benedikti, emrat e të cilëve mbart; por edhe me
të tjerë, si Shën Agostini, të cilin pata dhuratën e madhe ta njoh, si të themi,
nga afër, përmes studimit e lutjes, e që u bë shok i mirë udhe në jetën time e në
shërbimin tim”. Papa kujtoi një aspekt të rëndësishëm të përvojës njerëzore
e kristiane të Shën Agostinit, atë të kërkimit të shqetësuar të së Vërtetës. Karakteristike
kjo, shpjegoi, edhe në epokën tonë, në të cilën duket se relativizmi është, paradoksalisht,
e vërteta, që duhet ta udhëheqë mendimin tonë, zgjedhjen e rrugës në të cilën duhet
të ecim, mënyrën si duhet sillemi. Ipeshkvi Shenjt i Iponës, vijoi, ishte njeri, që
nuk jetoi kurrë përcipërisht, nuk kërkoi të ashtuquajturat ’të vërteta’, që nuk mund
t’i japin zemrës paqe, por atë të Vërtetë, e cila i jep kuptim gjithë jetës e është
streha, ku zemra, më në fund gjen paqen e qetësinë, aq të kërkuar: “E tija,
e dimë, nuk ishte rrugë e lehtë; mendoi ta gjente të Vërtetën në autoritet, në karrierë,
në pasje, në zërat, që i premtonin lumturi të menjëhershme; bëri edhe gabime, kaloi
periudha tejet të trishtuara, përballoi dështime, por, e kjo është e rëndësishme,
nuk u ndalua kurrë, nuk u kënaq asnjëherë vetëm me atë, që i dhuronte një vezullim
kalimtar drite; diti të hyjë brenda vetes e atje pa, siç shkruan në “Rrëfimet”, se
ajo e Vërtetë, ai Zot, që e kërkonte me forcat e veta, ishte aty, kishte qenë gjithë
pranë tij, nuk e kishte braktisur kurrë, kishte pritur me durim, për të hyrë përfundimisht
në jetën e tij”. Shën Agostini, vijoi Papa, në kërkimin e tij të shqetë,
e kuptoi se nuk ishte ai, që e gjeti të Vërtetën, por e Vërteta vetë, që është Zoti,
e ndoqi pas dhe e gjeti atë. E në këtë udhë drejt së Vërtetës, për Shenjtin, themelore
është heshtja: “Krijesat duhet të heshtin, duke krijuar atmosferën e pazhurmë, në
të cilën Hyji mund të flasë”. E kjo, vijoi Papa, është e vërtetë edhe në kohën tonë:
nganjëherë njerëzit kanë frikë nga heshtja, kanë frikë të thellohen në lutje, në mendime
për veprat e kryera, për vetë kuptimin e jetës: “Shpesh herë pëlqehet të
jetuarit e çastit në kalim, duke shpresuar më kot se mund të sjellë lumturi të përhershme;
pëlqehet të jetohet përcipërisht, pa e vrarë mendjen, sepse kështu jeta duket më e
lehtë; madje ndjehet një farë frike përballë kërkimit të së vërtetës, ose ndoshta
frikë se e Vërteta edhe mund të gjendet, mund të kapet, mund të ta ndryshojë jetën,
ashtu si ndodhi me Shën Agostinin”. Papa e përfundoi katekizmin me këtë
porosi: “Të dashur vëllezër e motra, dua t’ju them të gjithëve, edhe atij
që kalon çaste të vështira në rrugën e tij të fesë; edhe atij, që është pak e aspak
i pranishëm në jetën e Kishës; e edhe atij, që jeton sikur të mos kishte kund Zot,
të mos ketë frikë nga e Vërteta, të mos e ndërpresë kurrë ecjen drejt saj, të mos
pushojë kurrë s’e kërkuari të vërtetën e thellë mbi vetveten e mbi sendet, duke u
përpjekur ta shikojë me syrin e zemrës. E Zoti do t’i japë dritë, për ta bërë të
shikojë; e ngrohtësi, për të ndjerë pranë një zemër tjetër, që e do e dëshiron të
duhet”.