Benedikti XVI në Engjëllin e Tënzot u lut: Mari, Nënë e Mbretëreshë, dhuroja paqen
botës e na ndihmo të ndërtojmë qytetërimin e dashurisë!
(23.08.2010 RV)Në lutjen e Engjëllit të Tënzot, kremtuar dje në Kastel Gandolfo,
Papa lartoi një lutje prekëse për paqen në botë. Lutje drejtuar Marisë, që liturgjia
e djeshme e kremtoi me titullin Mbretëreshë. Zoja, pohoi Papa, na tregon se për të
hyrë në Mbretërinë e Zotit, duhet të ecim në rrugën e përvujtërisë.
Benedikti XVI,
pra, nënvizoi se tetë ditë pas solemnitetit të Të Ngjiturit të Zojës në Qiell, liturgjia
na fton ta nderojmë Marinë me titullin “Mbretëreshë”. Sundim i përvuajtur, ky i Marisë,
por që na tregon qartë se Zoti, siç këndon vetë Vasha e Nazaretit në Magnificat, “të
mdhajt prej së neltit rrotullim i sdrypi, prej së poshtit nalt të vogjlit me dorë
të vet i hypi”(përkthimi shqip është i dom Ndue Bytyçit). “Vasha e vogël
e e përvujtë e Nazaretit, u bë Mbretëreshë e botës! Është një nga mrekullitë, që
zbulojnë zemrën e Zotit”. Më pas Papa kujtoi se në histori gjejmë një mori
dëshmish, që flasin për nderimin publik të pushtetit mbretëror të Marisë. E pikërisht
Zojës së Bekuar, që Jezusi na e la si Nënë e Mbretëreshë, Ati i Shenjtë i lartoi lutjen
për mbarë njerëzimin: “Po ia besojmë ndërmjetësimit tënd lutjen e përditshme
për paqe, sidomos atje, ku sundon logjika e kobshme e dhunës; që të gjithë njerëzit
të binden se në këtë botë duhet ta ndihmojmë njëri-tjetrin si vëllezër, për të ndërtuar
qytetërimin e dashurisë. Mari, Mbretëreshë e paqes, lutu për ne!”. Gjatë
lutjes, Papa u ndalua edhe tek përmasa e pushtetit mbretëror të Marisë që, vërejti,
lidhet plotësisht me atë të Krishtit i cili, pas poshtërimit të kryqit, u naltua mbi
çdo krijesë: “Përmes një plani hiri, Nëna e Papërlyer bashkohet plotësisht
me misterin e të Birit; në Mishërim; në jetën e tij tokësore, një herë të fshehtë
në Nazaret e pastaj të shprehur në misionin mesianik; në Mundimet e në Vdekjen e
tij; e së fundi edhe në lumninë e Ngjalljes e të Ngjitjes në Qiell”. Nëna,
vijoi Papa, ndau me të Birin jo vetëm aspektet njerëzore të këtij misteri, por, për
virtyt të Shpirtit Shenjt, që ishte në të, edhe ndjetin e thellë të vullnetit hyjnor,
kështu që e gjithë jeta e saj, e varfër dhe e përvuajtur, u lartua, u shndërrua, u
lumnua, duke kaluar ‘nëpër portën e ngushtë”, që është vetë Jezusi: “Po,
Maria është e para që kaloi nëpër ‘shtegun” e hapur nga Krishti për të hyrë në Mbretërinë
e Hyjit, shteg nëpër të cilin mund të kalojnë të përvuajturit, ata që besojnë në Fjalën
e Zotit e përpiqen ta jetojnë këtë fjalë”. Gjatë përshëndetjeve, drejtuar
shtegtarëve, duke folur në gjuhën frënge, Papa pohoi se shëlbimi u përket të gjithë
njerëzve. E kjo ishte edhe ftesë për t’i pranuar të gjithë, pavarësisht nga raca,
populli e kombi, të cilit i përkasin. Më pas, një ftesë tjetër, drejtuar prindërve,
për t’i edukuar bijtë me frymën e vëllazërisë universale e edhe një lutje drejtuar
Zojës që t’i shoqërojë fëmijët në shkollë, hapja e së cilës po afrohet. Kur ndjehemi
të humbur, të paqartë, të brishtë, kur jeta tokësore na lodh e na mundon, pohoi Papa,
duke u folur shtegtarëve të gjuhës polake, në Krishtin gjejmë kuptimin e rrugës sonë,
mësojmë si duhet të sillemi e arrijmë përkryerjen e jetës në ringjallje.