(19.08.2010 RV)Të dashur dëgjues, dëgjojmë shpesh të flitet për “Mbretërinë
e Zotit”. Ç’kuptojnë të krishterët me këtë term dhe si shpjegohet ai në Shkrimin
Shenjt? Kësaj pyetjeje do t’i përgjigjemi sot.
Kur Jezu Krishti filloi
shërbimin e tij publik në Galile, fjalët e para që tha janë: “Kthehuni, se mbretëria
e qiejve është ngjat!” (Mt 4,17). U bëri kështu jehonë të njëjtave fjalë, që thoshte
pararendësi i tij, shën Gjon Pagëzuesi (3,2). Qendra e Lajmit të Mirë të krishterë
gjendet pikërisht rreth këtij simboli, të përdorur që në Besëlidhjen e Vjetër, me
domethënien e dyfishtë të “qeverisjes e mbizotërimit” hyjnor dhe të “popullit
të qeverisur me drejtësi nga Zoti”. Natyrisht, imazhi është marrë nga qytetërimet
e Lindjes së Afërt dhe nga vetë përvoja e Izraelit, që kishte zgjedhur formën monarkike
të qeverisjes rreth gjysmës së shekullit XI para Krishtit. Madje, dinastia e Davidit
konsiderohej si rruga historike drejt mesianizmit. Koncepti i “Mbretërisë së
Zotit” (Shën Mateu Ungjilltar përdor “mbretërinë e qiejve” për të shmangur,
si jude që është, përdorimin e emrit hyjnor, të shenjtë e të pashqiptueshëm) ka të
bëjë me planin e një rendi të ri botëror, të një shoqërie të drejtë, të një gjithësie
në harmoni, siç qe dashur e krijuar nga Zoti. Fatkeqësisht, ky plan ndryshoi për shkak
të mëkatit të njeriut. Psalmet që i thurin lavde “Mbretërisë së Zotit” (47;93;96-99)
ngrenë në qiell ndërhyrjen e Hyjit për t’i dhënë zanafillën asaj “mbretërie të
së vërtetës e të jetës, të shenjtërisë e hirit, të drejtësisë, të dashurisë e paqes”,
që kremtohet si shpresë në liturgjinë e solemnitetit të Krishtit Mbret. Po, sepse
Jezusi, jo vetëm e përuron mbretërinë e Zotit në shembëlltyrat e veta e në veprën
e tij shëlbuese, por paraqitet edhe si mbret në skenën madhështore të gjykimit të
mbramë, përshkruar nga Mateu: “E kur të vijë Biri i njeriut në madhërinë e vet
e me të gjithë engjëjt, do të ulet mbi fronin e vet të madhërueshëm…Atëherë Mbreti
do t’u thotë atyre që do të jenë në të djathtën e tij…” (25,31.34). Ai është “basiléus”-i
grek, sovrani me detyrën, që ishte e Zotit në Besëlidhjen e Vjetër: “Zoti…vjen
për të gjykuar tokën! Do ta gjykojë botën me drejtësi, do t’i gjykojë popujt me të
vërtetën e tij…sepse e Drejta e Drejtësia janë themeli i fronit të tij “(Ps 96,13;
97,2; 98,9). Por qeverisja dhe mbretëria e Hyjit është krejtësisht e ndryshme nga
mbretëritë e kësaj toke. Këtë e bën të qartë Jezusi, kur në faqen e jashtëzakonshme
të Ungjillit të shën Gjonit, i thotë poncit Pilat: “Mbretëria ime nuk është e kësaj
bote. Po të ishte Mbretëria ime e kësaj bote, ushtarët e mi do të kishin luftuar që
të mos u bie në dorë judenjve…Unë leva dhe erdha në botë për të dëshmuar të vërtetën”
(18,33-37) Shën Gjoni Ungjilltar do të na e paraqesë mëse 10 herë temën e Krishtit
Mbret, duke përshkruar mundimet e tij e duke e kthyer kryqin e kryqëzimit në fronin
e lavdisë së të Kryqëzuarit. Krishti pra, është një mbret, që nuk sillet si “mbretërit
e paganëve, që sundojnë e kërkojnë të quhen ‘Bamirës’” (Lk 22,25). “Biri
i njeriut nuk erdhi për të qenë shërbyer, por që ai të shërbejë e të japë jetën e
vet si shpërblim për të gjithë”(Mk 10,45). Jezusi flijohet e rrethohet
jo nga të fuqishmit e botës, por nga të fundmit dhe e ndan fatin me ta. Kjo është
“mbretëria e Zotit”, e ngjashme me “kokrrën e sinapit…më e vogla ndër të
gjitha farërat”, ose me “tharmin e përzier me miellin” e historisë njerëzore
(Mt 13,31-33). E fshehur, por e frytshme, farë e hedhur në brazdat e tokës, por pjellore.
Kjo është “Mbretëria e Zotit”, ardhjen e së cilës e lusim me Atynën, kur themi: “Ardhtë
Mbretëria jote!”. E ky është Lajmi i Mirë që, në emër të Krishtit, përsëritet
nga dishepujt e Tij: “Gjatë udhëtimit predikoni: ‘Mbretëria e qiellit është ngjat!’”
(Mt 10,7).