E mira e përbashkët në doktrinën shoqërore të Kishës: reflektim i prof. Baxhos
(19.08.2010 RV)Kisha ka qenë dhe
është gjithnjë e impenjuar, në nivel kombëtar e ndërkombëtar, në mbrojtjen e së mirës
së përbashkët të shoqërisë. Në qendër të punës dhe të reflektimeve të saj janë të
drejtat e patjetërsueshme të njeriut dhe detyrat, që ajo vetë ka brenda bashkësisë
se krishterë, përsa i përket respektimit të drejtësisë, të paqes e të solidaritetit.
Një nga impenjimet e shpeshta të Kishës Katolike ka të bëjë me luftën kundër korrupsionit,
i cili shkakton padrejtësi e varfëri, siç e dinë mirë ata që kanë pasur të bëjnë me
zyrat shtetërore në Shqipëri dhe Kosovë. Folëm me pedagogun e Filozofisë Politike
në Institutin universitar Sofia të Lopianos në Firence, prof. Antonio Maria Baxho: Normalisht,
kur korrupsioni shihet si i tepërt dhe i padurueshëm, pika e parë që duhet të marrim
parasysh është dobësimi i politikës. Fatkeqësisht, një nivel i caktuar korrupsioni
është fiziologjik, bën pjesë në gjërat njerëzore. Gjendja rëndohet dhe korrupsioni
bëhet i patolerueshëm kur planet politike për vendin janë të dobta, kur shoqëria copëzohet
e kur njerëzit çojnë ujë vetëm në mullirin e tyre, në vend që të punojnë për atdheun.
Sidomos në periudha krize, kur njerëzit vuajnë më shumë se zakonisht, është e patolerueshme
nga pikpamja shoqërore dhe morale, që disa njerëz të mos respektojnë rregullat. Domethënë,
jo të gjitha sistemet politike i shërbejnë së mirës së përbashkët… Sigurisht.
Jo çdo sistem mund të punojë për të mirën e përbashkët. Askush nuk duhet të mendojë
se diktatura prodhon të mira të përbashkëta. Dua të kujtoj se për të arritur tek ideja
e së mirës së përbashkët, duhet pranuar e zbatuar një koncept shumë i rëndësishëm,
që është ai i shtetit të së drejtës. Pra, që të ekzistojë e mira e përbashkët, duhet
qeverisur jo për vete, por për të tjerët. Duhet qeverisur jo sipas qejfit, por duke
iu bindur ligjeve e duhet gjetur konsensusi për këtë. Mendimi shoqëror i krishterë,
apo doktrina shoqërore e krishterë ka disa kufi për të vendosur nëse një sistem është
i drejtë, apo jo. Gjendja politike e Italisë është e ngjashme me atë të Shqipërisë,
pavarësisht se në nivele të ndryshme. Ku ka përfunduar shoqëria civile, ajo që sjell
vlera, që e zhvillon vendin në drejtimin e duhur? Nuk ka opozitë të mjaftueshme.
Nuk është vetëm problem i së djathtës. Kjo duhet nënvizuar. Është një shtresë e tërë
politike, që ndihet e dobët e nuk dëshiron të zgjidhet, por zgjedh vetveten. Vetëm
se kështu ndryshohet sistemi, pasi në vend të demokracisë lindin oligarki, pra, grupe
pushteti që zëvendësojnë njëri-tjetrin, sikur ta linin karrigen trashëgim e jo për
shkak të zgjedhjes së popullit sovran. Ky është largim nga idealet demokratike, në
thelb e në formë. Ajo që humb, në këtë rast, është pikërisht ideja e së mirës së përbashkët,
e cila bëhet një koncept bosh, që gjithkush mund ta mbushë si të dojë, me veprimtarinë
e vet në qeveri. Por e mira e përbashkët realizohet vetëm me disa kushte të caktuara. Cili
është propozimi kulturor katolik për ta ndryshuar këtë situatë? Mendoj se duhet
filluar një fushatë për këtë, pasi para partive e institucioneve ekziston politika
e shoqërisë. Kushtetuta dhe presidenti i Republikës janë garantët. Vetëm se shoqëria
civile duhet ndërtuar jo nga partitë, jo nga ligjet, por nga ndërgjegjja qytetare,
që bëhet aktive. O sot, o kurrë!