Pakistan: vetëm një e gjashta e të përmbyturve ka marrë ndihma. Ngjall shqetësim higjiena
në kampet e të shpërngulurve.
(17.08.2010 RV)Gjendja në Pakistan, pas përmbytjeve të dy javëve të shkuara,
vazhdon të mbetet kritike. Më shumë se 800 mijë shtëpi janë shkatërruar nga ujrat
e rrëmbyer, deklaroi në një konferencë për shtyp ministri i informacionit i qeverisë
pakistanase Kamar Zaman. Më pas ministri shtoi se pritet përmirësim i motit edhe në
zonat e Panxhabit dhe të Sindit, ku ditët e kaluara lumejt që vërshyen shkaktuan dëme
në njerëz dhe në materiale. Ndërkaq, edhe solidariteti ndërkombëtar është vënë në
lëvizje, por për arsye të ndryshme, nga gjashtë milionë të shpërngulur vetëm një milion
ka marrë ndihma. Sidoqoftë, tani po ngjall shumë shqetësim situata higjenike në kampet
ku gjenden të shpërngulurit. Sipas burimeve të OKB-së një në dhjetë vetë rrezikon
të marrë infeksione të ndryshme.