Ungjilli i të riut pasanik. Benedikti XVI: nuk na shpëtojnë gjërat kalimtare, por
miqësia me Zotin.
(16.08.2010 RV)Dje, në solemnitetin e Të Ngjiturit të Zojës në Qiell, Benedikti
XVI u lut që të forcohet besimi ynë në jetën e pasosur, në atë Mbretëri qiellore,
e cila nuk është shpikje abstrakte, por dashuri konkrete e Hyjit, që fiton mbi vdekjen.
E Ungjilli i liturgjisë së sotme na propozon historinë e djaloshit pasanik, i cili
shkon të takojë Jezusin për ta pyetur ç’duhet të bëjë, që të fitojë jetën e pasosur,
në sa është i bindur se i respekton të gjitha urdhërimet e Tënzot. Mbi këtë faqe,
Papa ka folur disa herë në katekizmat e tij. E shpesh, gjatë papnisë, u ka kujtuar
besimtarëve se feja nuk është një grumbull ndalimesh e mohimesh, siç paraqitet nganjëherë,
por takim çlirues i njeriut të lirë me Zotin, që e do: “Krishterimi nuk
është moralizëm. Nuk jemi ne, që duhet të bëjmë çka Zoti pret nga bota; detyra jonë
e parë është të hyjmë në këtë mister ontologjik. Etika është pasojë e qenies: më parë
Zoti na jep një qenie të re, e kjo është dhurata më e madhe; të qenët i paraprin veprimit…
duhet vetëm të veprojmë në përkim me identitetin tonë të ri. Nuk është, pra, fjala
për një bindje të jashtme, por për realizimin e dhuratës së qenies së re. Nuk mund
t’i bindemi vetëm një ligji, që është jashtë nesh, e as na kërkohet të jetojmë sipas
moralizmit heroik. Njeriu është i drejtë, në se e jeton mirë fjalën e Zotit. Kështu
vijon të jetë edhe sot, por për të krishterin drejtësia e vërtetë nuk është ajo e
bindjes para disa normave. Është ajo e dashurisë krijuese, që e gjen vetvetiu të bukurën
e të mirën” (Fjalim në takimin me studentët e Seminarit të Madh Romak,
13 shkurt 2010). Të gjitha urdhërimet e Zotit përmblidhen në një ligj të vetëm:
në atë të dashurisë për Hyjin e për të afërmin, pa harruar se njeriu duhet të jetë
gjithnjë i lidhur me Krishtin, si shermendët me hardhinë: “E kush është një
me Krishtin… jeton nga ky ligj i ri e nuk pyet: “mund ta bëj këtë, apo jo?”; ‘duhet
ta bëj, apo s’duhet?”; jeton me entuziazmin e dashurisë, që nuk pyet “kjo është e
nevojshme, apo e ndaluar?”, por dëshiron thjesht, në frymën krijuese të dashurisë,
të jetojë me Krishtin e për Krishtin e ta japë gjithë vetveten për Zotin, duke provuar
gëzimin e lidhjes së frytit”. Vetëm kështu mund të bëhemi të afërt me Hyjin: “Jo
më skllevër, që i binden një urdhëri, por miq, që njihen, që kanë të njëjtin vullnet,
të njëjtën dashuri”. Jezusi i propozon të riut të pasur rrugën e përsosurisë.
Por si mund ta kuptojmë përsosurinë në fe? “Përsosuria, domethënë mirësia,
aftësia për ta jetuar fenë e dashurinë, është një, por shfaqet në forma të ndryshme.
Krejt e ndryshme është shenjtëria e një çertozini, nga ajo e një politikani, e një
shkencëtari nga ajo e një fshatari, e kështu me radhë... Por nuk duhet harruar se
gjithçka është e rëndësishme para syve të Hyjit: është e bukur, në se jetohet deri
në fund të fundit me atë dashuri, që shëlbon botën....duke bërë vullnetin e Zotit,
gjë që nuk do të thotë ta kesh jetën për vetvete, por ta dhurosh; nuk do të thotë
të përpiqesh vetëm për vetveten, por për t’ua dhuruar këtë vetvete të tjerëve (Fjalim
drejtuar të rinjve, 25 mars 2010).Jezusi e fton të riun t’i braktisë të gjitha
pasuritë, për ta ndjekur pas, por ai nuk ka guxim ta ndjekë. Largohet, prandaj, i
trishtuar, sepse ka shumë pasuri e është tejet i lidhur me to. Na kujton Papa: “Pasuria,
ndonëse gjë e mirë në vetvete, nuk duhet shikuar si e mirë absolute. Duhet të mendojmë,
sidomos, se nuk na e siguron shëlbimin, madje edhe mund ta rrezikojë seriozisht. Është
urti e virtyt të mos e ngjitësh zemrën pas të mirave të kësaj bote, sepse gjithçka
kalon, gjithçka mund të përfundojë papritur e pa u kujtuar. Thesari që duhet të kërkojmë
papushim ne, të krishterët, gjindet ‘atje lart, ku Krishti rri ndejë në të djathën
e Atit”.