Në Prishtinë fillon Seminari i 29-të ndërkombëtar për gjuhën e kulturën shqipe, në
qendër do të jetë e Lumja Nënë Terezë
Kryeqyteti i Kosovës, Prishtina, pret albanologë dhe studiues të huaj në seminarin
e 29-të ndërkombëtar për gjuhën, letërsinë dhe kulturën shqiptare, nga16 deri më 27
gusht. Në dy sesionet e seminarit, në sesionin e gjuhësisë dhe në sesionin e letërsisë,
temat kryesore do të jenë "Kontaktet e sotme të shqipes" dhe "Poezia e sotme shqipe",
ku pritet të paraqiten më shumë se 100 kumtesa. Diskutimi kryesor i seminarit
i kushtohet humanistes së madhe, nobelistes shqiptare, Nënë Tereza, në kuadër të 100-vjetorit
të lindjes së saj. Gjatë ditëve të seminarit, më shumë se 80 të huaj do të ndjekin
kurset e gjuhës shqipe, në tri nivele. "Ky seminar është shndërruar në
një institucion të rëndësishëm, i cili nxit zhvillimin e dijes albanologjike, duke
e përhapur dhe afirmuar atë në botë", u ka deklaruar mediave në Prishtinë drejtuesi
i këtij projekti, Liman Matoshi, i cili ka pohuar se gjithçka është gati për fillimin
e kësaj ngjarje të rëndësishme albanologjike, tradicionale. Seminari ndërkombëtar
për gjuhën, letërsinë dhe kulturën shqiptare, nisi të organizohet në vitin 1974, viti
i Kushtetutës kur iu dhanë disa të drejta shqiptarëve të Kosovës në kuadër të Federatës
së atëhershme Jugosllave. Në fillim të viteve '90 organizimi i tij i përvitshëm
u ndërpre për shkak të masave të dhunshme të Beogradit në Kosovë dhe dëbimit të shqiptarëve
nga institucionet. Në vitet 1995-1996, sesionet e këtij seminari u mbajtën në Tiranë,
në bashkëpunim me Institutin e Gjuhësisë e të Letërsisë të Akademisë së Shkencave
të Shqipërisë. Pas luftës në Kosovë, nga viti 2000 seminari u rikthye për të zhvilluar
veprimtarinë aty ku e filloi dhe ku u themelua - në Fakultetin Filozofik (tani Fakulteti
i Filologjisë) në Universitetin e Prishtinës.