Falja është mënyra me të cilën Zoti fiton: reflektime të Benediktit XVI mbi Ungjillin
e mëshirës
(12.08.2010 RV)“Nuk të them deri në
shtatë herë, por deri në shtatëdhjetë herë shtatë”: kjo është këshilla e Ungjillit
të sotëm, që Jezusi ia thotë Pjetrit, i cili e pyeste sa sa herë ishte e drejtë të
falte. Krishti tregon shembëlltyrën e pronarit, që i fal borxhin shërbëtorit të vet,
i cili, nga ana e tij, nuk tregon po të njëjtën mëshirë për një tjetër, që i kishte
borxh. Benedikti XVI është ndalur shpesh në reflektime mbi mëshirën e Zotit e mbi
forcën e faljes. Falja, pat thënë Papa në katedralen e Albanos, më 21 shtator 2008,
është mënyra me të cilën fiton Zoti. Pavarësisht nga brishtësia jonë, Hyji, plot mëshirë
e dëshirë për falje, e shndërron jetën e njeriut dhe e thërret ta ndjekë. Dashuria
e Zotit është pa kufi e na fton të marrim pjesë në të, në këtë dashuri, që buron nga
zemra e Jezusit, nga Eukaristia: “Sa herë që i afroheni elterit për Kremtimin
eukaristik, hapjani zemrën faljes e pajtimit vëllazëror, të gatshëm për të pranuar
ndjesën e atyre që ju kanë fyer e për t’i falur” (Mesha në katedralen e Albanos, 21
shtator 2008). Kjo falje lind nga kthimi i zemrës, nga përvuajtëria, nga pranimi
i faktit, që edhe ne jemi mëkatarë. “Pikërisht duke e ulur veten sëbashku me Krishtin
– vëren Papa – ne ngrihemi deri tek Ai e deri tek Zoti”: “Zoti është Dashuri,
prandaj zbritja, përulja, që kërkon dashuria, është njëkohësisht edhe ngjitje e vërtetë.
Pikërisht kështu, duke e ulur veten, ne arrijmë lartësinë e Jezu Krishtit, lartësinë
e vërtetë të njeriut” (Homelia, Mesha e Rrëshajave, 15 maj 2005). Edhe Kisha
lind nën yllin e faljes. Me të vërtetë, pikërisht falja është pushteti i ri që Jezusi
u jep Apostujve, në ditën e Rrëshajave. Falja i lidh njerëzit. Fiton mbi ndarjet e
njerëzimit: “Forca, që hap e bën që të tejkalohet Kulla e Babelit, është forca
e faljes. Jezusi mund ta dhurojë faljen dhe fuqinë për të falur, pasi Ai vetë vuajti
pasojat e fajit dhe i shkriu në flakën e dashurisë së Tij. Falja vjen nga Kryqi; ai
e shndërron botën me dashurinë që dhuron. Zemra e Krishtit e hapur mbi Kryq është
porta përmes së cilës hyn në botë hiri i faljes. E vetëm ky hir mund ta shndërrojë
botën e të punojë për paqen” (Homelia, Mesha e Rrëshajave, 15 maj 2005). Mbi
temën e faljes, Papa ndalet gjatë në katekizmin kushtuar Judës Iskariot, apostullit,
që tradhtoi Krishtin. Edhe Pjetri, kujton Ati i Shenjtë, e tradhtoi Zotin, por diti
ta pranojë faljen e Tij, pasi ia besoi krejtësisht veten mëshirës hyjnore. Ndërsa
te Juda pendimi zgjon dëshpërim e në fund, një akt vetëshkatërrimtar, pasi ai vret
veten: “Është për ne një ftesë, që të mbajmë gjithnjë parasysh atë që thotë
shën Benedikti: ‘Mos u dëshpëro kurrë nga mëshira hyjnore’… Jezusi e respekton lirinë
tonë; Jezusi pret të jemi gati për pendesë e për kthim: është plot mëshirë e falje”
(Audienca e përgjithshme, 18 tetor 2006).