(11.08.2010 RV)Liqeni Peruçac në Serbi ishte pothuaj i panjohur deri më 19
korrik, kur pas zbrazjes nga uji për riparimin e digës, ekspertët mjeko-ligjorë filluan
kërkimet për të identifikuar trupat, që dukeshin qartë në fund të tij. Deri tani,
aty janë gjetur njerëz me kombësi të ndryshme, madje edhe gjermanë të kohës së Luftës
II Botërore. Sot, jepet lajmi se është gjetur një pjesë e kamionit frigorifer me kufomat
e 50 shqiptarëve nga Kosova. Sipas televizionit serb, ai është hedhur në liqen në
vitin 1999. Kërkimet vazhdojnë nën kujdesin e Gjykatës së veçantë serbe për krimet
e luftës. Në deklaratën për televizionin serb, prokurori për krime të luftës Vladimir
Vukçeviq nuk i ka bërë publike detajet e hetimeve, por ka theksuar "gatishmërinë e
organeve shtetërore për të hetuar edhe gjurmët më të vogla të çfarëdo krimi të luftës".