Në SHBA-të, tërhiqet denoncimi kundër Selisë së Shenjtë në një çështje për pedofili

(10.08.2010 RV)Në Kentaki të SHBA-ve, tre persona, që kanë akuzuar klerin vendas për abuzime seksuale, vendosën të heqin dorë nga kauza kundër Selisë së Shenjtë. Lajmi u dha dje nga avokati i tyre, Uiliam MekMarri. Për avokatin e Selisë së Shenjtë në SHBA, Xhefri Lena, kjo tregon se padia ishte e gabuar.
“Nuk ka ekzistuar kurrë një politikë e Selisë së Shenjtë, për fshehjen e abuzimeve me fëmijët” – deklaron në një notë avokati Xhefri Lena. “Që çështja kundër Selisë së Shenjtë ka qenë e gabuar që në fillim, nuk do të thotë se viktimat nuk kanë vuajtur për shkak të abuzimeve”, për të cilat duhen dënuar individët, që i kanë kryer e jo Vatikani. Gjithsesi, vazhdon avokati në notën e tij, përfshirja e Selisë së Shenjtë në çështje dhe jehona që pati kjo në shtyp, s’bëri tjetër, veçse tërhoqi vëmendjen nga objektivi më i rëndësishëm i mbrojtjes së fëmijëve.
Nga ana e tij, avokati i akuzës, Uiliam MekMarri ka deklaruar se shumica e viktimave të abuzimeve kanë arritur marrëveshje me dioqezat e ndryshme për dëmshpërblimet e tani, nuk mund të hedhin në gjyq edhe Vatikanin.
Për këtë çështje, u prononcua sot, drejtori i Sallës së Shtypit të Selisë së Shenjtë, atë Federiko Lombardi:
“Selia e Shenjtë – tha ai, duke iu përgjigjur pyetjeve të gazetarëve – mëson me kënaqësi lajmet për kauzën në Kentaki. Natyrisht, kjo nuk do të thotë në asnjë mënyrë minimizimin e tmerrit dhe të dënimit për ngjarjet e abuzimeve seksuale, si edhe të dhimbjes për vuajtjen e viktimave, pasi, siç ka vënë me të drejtë në dukje avokati Lena, drejtësia për viktimat e mbrojtja e të miturve duhet të mbeten objektiva parësore. Gjithsesi, është pozitive, që një çështje 6-vjeçare, mbi përfshirjen e supozuar të Selisë së Shenjtë në përgjegjësinë e fshehjes së abuzimeve, që ka pasur ndikime të forta negative mbi opinionin publik, përfundoi me vërtetimin se bazohet mbi një akuzë të pathemeltë”.