Ndryshimi i klimës përgjegjës për fenomene natyrore të jashtëzakonshme
(09.08.2010 RV)Qindra viktima, miliona pa shtëpi, dëme të pallogaritshme. Pasojat
e përmbytjeve e të zjarreve, që këto ditë kanë përfshirë Azinë dhe Evropën janë dramatike.
Përveç Rusisë, në Evropën Qendrore, po vuajnë nga përmbytjet edhe Gjermania, Polonia
e Republika Çeke. Ndërkaq, një valë ngrice në Amerikën e Jugut shkaktoi vdekjen e
dhjetra fëmijëve. Sipas ekspertëve, ngrohja e klimës mund të jetë shkaku i një fenomeni
të jashtëzakonshëm: një ishull i stërmadh akulli, katër herë sa Manhatani, është shkëputur
nga akullnajat e Grënlandës dhe po zhvendoset drejt Ngushticave të Naresit, rreth
1000 km në jug të Polit të Veriut. Ç’po ndodh me botën? Përgjigjet në mikrofonin tonë,
drejtori i Institutit të Biometereologjisë së Qendrës kërkimore italiane të Firences,
Xhampiero Maraki: Ndryshimi i klimës,
që sjell temperatura më të larta në sipërfaqen ujore të planetit e pra, sasi më të
mëdha energjie në qarkullim, është përgjegjës për të gjitha ngjarjet e jashtëzakonshme.
Në veçanti, është përgjegjës për dy prej tyre: si për temperaturat shumë të larta,
që vijnë nga fakti se ajri i nxehtë nga Ekuatori shtrihet më në veri se në të kaluarën,
ashtu edhe për aspektin tjetër, i cili ka të bëjë me intensitetin e shirave. Shumë
energji do të thotë edhe intensitet fenomenesh, sidomos kur bie shi. Kjo që po ndodh
në Moskë e në Evropën qendrore është pjesë e një filmi, që e kemi parë gjatë 15-20
vjetëve të fundit në krejt planetin.