Thirrje e Papës për popullsitë e Pakistanit, të Afganistanit e të Rusisë, të dëmtuara
nga fatkeqësi të rënda natyrore
(03.08.2010 RV)Në përfundim të audiencës së përgjithshme, Benedikti XVI bëri
një thirrje të zjarrtë për popullsitë e Pakistanit e të Afganistanit, të cilat këto
ditë vuajnë pasojat e përmbytjeve, që kanë shkaktuar 1400 të vdekur e kanë lënë qindra
mijëra vetë pa shtëpi. Papa kujtoi edhe një dramë tjetër, atë të zjarreve në Rusi,
që deri tani kanë shkaktuar 48 viktima: “Në mënyrë të
veçantë, mendoj për zjarret e mëdha në Federatën Ruse e për përmbytjet shkatërrimtare
në Pakistan e në Afganistan. I lutem Zotit për viktimat e jam afër shpirtërisht me
të gjithë të sprovuarit nga këto fatkeqësi. Për ta i kërkoj Hyjit t’ua lehtësojë vuajtjen
e t’i mbështesë në vështirësi. Uroj gjithashtu, të mos u mungojë solidariteti i të
gjithëve”. Përmbytjet në Pakistan kanë sjellë tmerr e shkatërrim, siç nënvizon
në mikrofonin tonë, murgesha domenikane e Shën Katerinës së Sienës, motër Gabriela
Seganti, me telefon nga Faisalabadi: Të gjitha zonat përreth lumenjve të
mëdhenj janë përmbytur. Uji e ka rritur shumë nivelin e shkatërron shtëpitë, sidomos
në fshatra, ku ka shumë viktima, sepse njerëzit nuk kanë kohë të ikin. Natyrisht,
ata që ikin humbasin gjithçka: shtëpinë, kafshët shtëpiake; të korrat janë shkatërruar
krejtësisht. Problemi është se shiu vazhdon të bjerë. Ç’po bëni ju misionaret
për të ndihmuar popullsinë? Arrijmë tek ato familje që mundemi, por kemi
edhe shumë kushërinj të vetë motrave tona, për të cilët nuk dihet se ç’ka ndodhur.
Mundohen të lidhen në njëfarë mënyre, por për shumë vetë nuk dihet ku janë. Për ne,
është e pamundur të shkojmë në ato zona, ku niveli i ujit është i lartë. Në këtë periudhë
ka gjithnjë munsone që vijnë nga India, por një gjendje si kësaj radhe nuk e kemi
parë kurrë. Ekziston rreziku i vdekjes nga uria, apo nga epidemitë? Kanë
ngordhur shumë kafshë… Duhet edhe asistencë, ilaçe. Njerëzit kanë humbur çdo gjë e
nuk e di si do t’ia bëjnë. Është problem shumë i madh. Duhet të kuptojmë më parë si
dhe ku të strehohemi, pastaj si t’i veshim, si t’u japim për të ngrënë këtyre mijëra
njerëzve, që kanë humbur gjithçka. Cila është thirrja juaj si murgesha misionare
domenikane në Pakistan? Thirrja është që kush mund të japë ndonjë ndihmë
ekonomike, ta bëjë këtë urgjentisht. Shpresojmë të qetësohet koha, që të shkojmë tek
personat për t’i ndihmuar.
Një vend tjetër, i shkatërruar nga fatkeqësi
natyrore është Rusia. Patriku ortodoks i Moskës dhe i të gjitha Rusive, Kirill u ka
kërkuar ipeshkvijve të dioqezave ku ka rënë zjarri, të organizojnë një rrjet ndihmash
për mijëra personat, që kanë mbetur pa shtëpi për shkak të flakëve, në këtë valë të
jashtëzakonshme vape, me temperatura deri në 40°C.