30 ліпеня ў мястэчку Высокае, што на Берасьцейшчыне, адбылося ўрачыстае адкрыцьцё
помніка ахвярам Галакосту. Гаворка ідзе пра больш за 3 тысячы габрэяў, якія былі забітыя
фашыстамі ў мястэчку Высокае, а таксама ў канцлягеры Трэблінка ва ўсходняй Польшчы.
Гэта было маштабнае мерапрыемства з удзелам прадстаўнікоў беларускіх уладаў, а
таксама дыпляматычных місіяў Ізраіля, Расеі й Польшчы, - тлумачыць старшыня Берасьцейскага
таварыства габрэяў "Брыск" Барыс Брук. Барыс Брук: Мы запрасілі Генэральнага консула
Польшчы ў Берасьці, Генэральнага консула Расеі, пасла й першага сакратара пасольства
Ізраіля ў Беларусі. Апрача таго, былі запрошаныя прадстаўнікі габрэйскіх арганізацыяў
у Беларусі й прадстаўнікі абласных уладаў. Старшыня Берасьцейскага таварыства габрэяў
"Брыск" Барыс Брук адзначыў, што габрэйскія асяродзьдзі прыкладаюць вялікія намаганьні,
каб увекавечыць памяць аб жудасных падзеях, якія здарыліся 65 гадоў таму.