Pushimet e Papës në Kastel Gandolfo: intervistë me imzot Semeraron
(01.08.2010 RV)Papa po kalon pushimet në Kastel Gandolfo. Ka shkuar në selinë
verore të papëve, që më 7 korrik e do të qëndrojë deri në fund të stinës së ngrohtë.
Me përjashtim të lutjeve të Engjëllit të Tënzot të dielave, do të jetë i lirë nga
çdo veprimtari zyrtare, deri më 4 gusht, kur do t’i rifillojë audiencat e përgjithshme
të së mërkurës. Për qëndrimin e tij në qytezën laciale, të dëgjojmë ipeshkvin e Albanos,
imzot Marçelo Semeraro:
Përgjigje:
- E pashë Papën të çlodhur, të kënaqur, edhe pse çasti i takimit me besimtarët
në Kastel Gandolfo është një nga ata, që e gëzon, e kënaq, sepse dëgjon zërat, përshëndetjet
që i drejtojnë besimtarët e shtegtarët, u shikon fytyrat…
Pyetje: -
Imzot Semeraro, ajo që më preku më shumë në lutjen e Engjëllit të Tënzot, ishte prania
e madhe e popullit në këto çaste të lutjes mariane… Përgjigje:
- Një turmë që pritet, por që në disa rrethana, edhe të çudit; e kjo është
aq e vërtetë, sa Papa shprehu dëshirën të dilte në anën tjetër të Pallatit Apostolik,
në pjesën që bie përmbi shesh, sepse besimtarët ishin vërtetë shumë e nuk i zinte
më oborri i brendshëm. Duhet pasur parasysh se janë besimtarë të ardhur nga mbarë
bota, gjë që kuptohet menjëherë nga këngët e tyre, nga përshëndetjet, nga urimet,
që u drejton Papa e, me të vërtetë në këto të të diela, ditë të vërteta feste, qyteti
i Kastel Gandolfos merr një gjallëri të veçantë. Natyrisht edhe në famullitë tona
duhet të shtojmë kremtimet e Meshëve, që t’u krijojmë të gjithë besimtarëve mundësinë
për të marrë pjesë qetësisht në Eukaristinë e së dielës.