Letër e kardinalit Dias ipeshkvijve dhe meshtarëve të Kinës kontinentale
(29.07.2010 RV)Pavarësisht nga vështirësitë e vuajtjet, duhet të vazhdohet
me guxim rruga e bashkimit në gjirin e Kishës: kështu shkruan prefekti i Kongregatës
për Ungjillëzimin e Popujve, kardinali Ivan Dias në letrën drejtuar ipeshkvijve dhe
meshtarëve të Kinës kontinentale, në përfundim të Vitit Meshtarak. Kardinali
thekson shembullin e besnikërisë së katolikëve kinezë ndaj Papës e Selisë së Shën
Pjetrit, të cilën shpesh e kanë paguar me vuajtje e persekutime nga ana e regjimit
komunist. Por pikërisht bashkimi me Shën Pjetrin e pasardhësit e tij, shkruan kardinali
Dias, duke cituar Benediktin XVI, është garanci lirie për barinjtë e Kishës e për
bashkësitë, që u janë besuar atyre. Përmasa tjetër e bashkimit ndërmjet të krishterëve,
vazhdon letra, është uniteti ndërmjet anëtarëve të bashkësisë kishtare. Kardinali
Dias lavdëron përpjekjet që ipeshkvijtë dhe meshtarët kinezë po bëjnë në këtë drejtim,
megjithë vështirësitë e lidhjes e pengesat e panumërta burokratike. Lutemi për ju,
u thotë prefekti për Ungjillëzimin e Popujve, që e përfundon letrën, duke kujtuar
figurën e shën Gjon Maria Vianejt, Famullitarit të Shenjtë të Arsit, të cilin e merr
si model për meshtarin. Ai, shkruan kardinali, duhet të jetë njeri i Zotit e i të
tjerëve, duhet të dallohet në lutje e në jetën e rregullt, duhet t’i rezistojë dëshirës
për t’u pasuruar, ose për të kërkuar favore. Shembulli për t’u ndjekur, u thotë kardinal
Dias meshtarëve të Kinës, është jezuiti, atë Mateo Riçi, misionar i paharrueshëm në
ato troje.