Cilat mund të jenë propozimet e Serbisë për Kosovën paraqitur OKB-së? Me ne prof. Roberto Moroco dela Roka.

(29.07.2010 RV) Serbia i paraqiti dje Asamblesë së Përgjithshme të OKB-së një propozim për zgjidhjen e “çështjeve të hapura” në lidhje me Kosovën, në të cilin nxit për një zgjidhje të pranueshme për të dyja palët. Por teksti i hartuar nga Ministria e Jashtme e Serbisë nuk e përmend fjalën “pavarësi”, pikërisht tani, pak ditë pas vendimit të Gjykatës së Hagës, e cila tha se shpallja e pavarësisë së Kosovës nuk e cënon të drejtën ndërkombëtare. Po, cila mund të jetë një zgjidhje e pranueshme për Beogradin? Çfarë synon të arrijë Serbia me këtë propozim?
Në mikrofonin tonë përgjigjet docenti i Historisë së Evropës Lindore pranë Universitetit “Roma Tre”, Roberto Moroco dela Roka:

Përgjigje: Për Beogradin në këtë moment, zgjidhja e pranueshme është një autonomi e gjerë, shumë e gjerë, por jo pavarësi. Mbase Beogradi nuk e di shumë mirë se çfarë kërkon, ndoshta edhe ndonjë ndarje, copëtim, por kurrsesi pavarësi.

Pyetje: Po për Prishtinën, e cila përsërit se pavarësia nuk është në diskutim, cila mund të jetë zgjidhja?

Përgjigja: Asnjë tjetër përveç pavarësisë. Shqiptarët, sigurisht, do ta refuzojnë një propozim të ngjashëm serb për Kombet e Bashkuara. Edhe aleatët kryesorë të shqiptarëve, SHBA, do ta refuzojnë. Sigurisht, do të kishte qenë mirë që marrëveshja të ishte arritur që në fillim. Pak më shumë se një e treta e shteteve të botës e kanë njohur pavarësinë e Kosovës, pra dy të tretat nuk e kanë njohur ende. Sidoqoftë shqiptarët nuk e marrin parasysh këtë gjë dhe shpresojnë se dalëngadalë edhe shtetet e tjera do t’i njohin.

Pyetje: Si mund të interpretohen ngjarjet e fundit, tani, pak ditë pas vendimit të Gjykatës së Hagës në favor të shqiptarëve?

Përgjigje: Beogradi nuk mendon se e ka humbur davanë e Kosovës. Në Ballkan, situata prezente, nuk merret kurrë si përfundimtare. (...)

Pyetje: Po atëherë, e ardhmja e Prishtinës dhe e Beogradit nga kalon?

Përgjigje: Kalon nëpër një marrëveshje të fqinjësisë së mirë, që mund të jetë në favor të të dyja palëve, si të shqiptarëve ashtu edhe të serbëve.