Bruksel: Ministrat e jashtëm të BE-së flasin për dialog ndërmjet Prishtinës e Beogradit.
(26.07.2010 RV) Ministrat e Jashtëm të 27 vendeve anëtare të Bashkimit Evropian
vijuan sot diskutimet e tyre rreth Kosovës, pas shpalljes së mendimit pozitiv të Gjykatës
Ndërkombëtare të Drejtësisë. GJND-ja u shpreh se Deklarata e Pavarësisë nuk është
në kundërshtim me normat e së drejtës ndërkombëtare. Por, duke u bazuar në deklaratat
e para të disa ministrave nga vendet e BE-së, që nuk e kanë njohur Kosovën, shenjat
se këto vende mund të ndryshojnë qëndrimin janë të pakta. Ministrat e Spanjës dhe
të Qipros pohuan se vendet e tyre nuk do ta ndryshojnë mendimin dhe nuk do ta njohin
pavarësinë e Kosovës. Nga shumë burime të BE-së mësohet se në diskutimet e sotme
shumë ministra përsëritën porosinë drejtuar Beogradit e Prishtinës për një dialog
praktik, i cili do të ndihmonte në lehtësimin e marrëdhënieve në rajon, në përmirësimin
e jetës së përditshme të njerëzve dhe në afrimin e integrimeve në Bashkimin Evropian. Ata e
mbështetën plotësisht porosisë që dha, në emër të BE-së, përfaqësuesja e lartë për
politikë të jashtme dhe siguri, Kethrin Eshton, e cila, menjëherë pas shpalljes së
mendimit të GJND-së, i ftoi Beogradin dhe Prishtinën ta shfrytëzojnë këtë fazë të
re për nisjen e dialogut. BE-ja pohon se është gati ta ndihmojë këtë dialog dhe
i fton të dyja palët ta pranojnë ofertën. Në anën tjetër, disa shtete të Bashkimit
Evropian kujtojnë se në këtë dialog janë dy linja të kuqe. E para është se nuk mund
të ketë rinegocim të statusit të Kosovës, pasi kjo çështje konsiderohet e përmbyllur,
si dhe nuk mund të diskutohet për ndarje territoriale të Kosovës apo për shkëmbim
territoresh.Sido që të jetë, edhe sot, deri në këto çaste, shihet se përfundimi në
të cilin arriti GJND-së nuk ndihmoi shumë në krijimin e një mendimi unik në Bashkimin
Evropian përsa i përket njohjes së pavarësisë së Kosovës, ndonëse, siç thonë në BE,
Bashkimi Evropian vazhdon të mbetet unik rreth angazhimit në Kosovë, përfshirë mbështetjen
e plotë të EULEX-it, në ndihmë të zhvillimit ekonomik dhe në garantimin e një perspektive
evropiane të vendit.