Në takimin me institucionet evropiane, Selia e Shenjtë kërkoi luftë kundër pabarazisë
e papunësisë
(20.07.2010 RV)U zhvillua dje në Bruksel takimi vjetor ndërmjet institucioneve
evropiane dhe krerëve fetarë të Evropës mbi temën e varfërisë e të përjashtimit shoqëror.
Është pikërisht kjo, tema e Vitit Evropian 2010. Në mbledhjen e kryesuar nga presidenti
i Komisionit Evropian, Zhozè Manuel Barroso, morën pjesë rreth 20 krerë fetarë, të
krishterë, hebrenj, myslimanë dhe eksponentë të bashkësive sikh e hinduiste nga 14
shtete evropiane. Një botë “në të cilën jetojnë krah përkrah të pasurit e të mjerët,
njerëzit që nuk kanë asgjë, që u mungon edhe thelbësorja dhe ata që hedhin pa merak
atë për të cilën të tjerë ndjejnë një nevojë të dëshpëruar” nuk është e drejtë e kjo
“pabarazi tepër e madhe, fatkeqësisht, rritet”: kjo qe fotografia që i bëri Evropës
së sotme, nënsekretarja e Këshillit Papnor për Drejtësinë e Paqen, Flaminia Xhovaneli.
Të dhënat zyrtare nuk lënë shumë hapësirë për interpretim: në Bashkimin Evropian,
85 milion vetë (17%) jetojnë nën pragun e varfërisë, në kuadrin e një krize ekonomike
e financiare, e cila po tregon se është krizë strukture, vlerash e besimi. Kjo duket
qartë nga rënia e lindjeve e shtimi i numrit të të papunëve. Mungesa e punës –
theksoi Flaminia Xhovaneli – është arsyeja kryesore e përjashtimit shoqëror dhe ka
marrë përmasa të pabesueshme. Është i patolerueshëm jo vetëm numri i të papunëve,
por edhe ai i punëtorëve të varfër, të cilët nuk arrijnë t’i sigurojnë një jetë dinjitoze
familjes, pavarësisht se punojnë. Përbëjnë 8% të punëtorëve të Bashkimin Evropian
e kapin shifrën 15 milion vetë. Është rritur edhe hendeku ndërmjet të pasurve e pjesës
tjetër të popullsisë. 20% e banorëve të Evropës kanë të ardhura pesë herë më të
mëdha se 80%-shi që mbetet. Presidenti i Këshillit të Konferencave Ipeshkvnore
të Evropës, kardinali Peter Erdë theksoi se duhet luftuar varfëria e jo të varfërit.
Lufta kundër varfërisë – u bëri jehonë fjalëve të tij përfaqësuesi tjetër katolik
në mbledhjen me institucionet evropiane, imzot Adrianus van Luyn, kryetar i Komisionit
të episkopateve të Bashkimit Evropian – nuk do t’i arrijë objektivat e veta, nëse
përdor vetëm mjete teknike ose administrative. Është e nevojshme që të dilet nga asistencializmi
dhe të kthehen të varfërit në subjekt të luftës së përbashkët të shoqërisë kundër
përjashtimit shoqëror. Për këtë, prelati shpjegoi kuptimin që i jep Kisha
Katolike solidaritetit, sipas të cilit, të varfërit e të pasurit kanë të njëjtin dinjitet.
“Solidariteti nuk përjashton askënd – nënvizoi imzot van Luyn, duke i ftuar politikanët
të shohin edhe përtej kufirit evropian, sidomos drejt Afrikës, kontinentit të kolonizuar
e të plaçkitur nga Evropa me shekuj, sot, kërcënuar rëndë nga qeveri të korruptuara,
nga lufta, nga thatësira e nga virusi i Sidës. Për emigrantët që vijnë
në Evropë nga këto zona dhe nga territore të tjera në vështirësi, prelati kërkoi që
të mos mbyllen krejtësisht kufijtë e kontinentit të pasur, por as të mos hapen krejtësisht.
Rruga e drejtë do të ishte solidariteti në vendin e origjinës, për të ndryshuar kushtet
e jetesës. Autonomia e inidividit sot ngrihet në qiell, sqaroi ipeshkvi, por në të
vërtetë ajo kufizohet nga varësia e njerëzve nga njëri-tjetri.