(20.07.2010 RV)Pas vrasjes së dy vëllezërve të krishterë, katolikë, Rahid e
Saxhid Emanuel, dje, në Faisalabad, Pakistan, vazhdon dhuna. Natën e kaluar, sipas
agjencisë Fides, dy mijë militantë islamikë sulmuan lagjen e krishterë të Waris Pura
dhe plagosën disa persona me armë zjarri duke shkatërruar rrugët e duke plaçkitur
dyqanet. “Në Waris Pura policia është kudo. Pas sulmit të natës së kaluar, gjendja
është shumë e nderë dhe familjet e krishtera janë mbyllur nëpër shtëpi nga frika.
Bashkë me tre meshtarë të tjerë e kaluam natën pagjumë duke u sjellur nëpër lagje,
duke iu kërkuar të krishterëve të mos i përgjigjen dhunës me dhunë.” Kështu i deklaroi
Agjencisë Fides, Atë Paskal Paulus, domenikan, famullitar i Kishës së Rruzares së
Shenjtë në Waris Pura, teatër i dhunës së djeshme. Sipas ipeshkvit të Faisalabadit,
imzot Xhozef Kuts, në Pakistan ka forca të errëta që përpiqen të ushqejnë dhunën,
urrejtjen dhe konfliktin ndërmjet dy bashkësive. “Zanafilla e këtyre sulmeve kundër
të krishterëve është ligji i blasfemisë. Kisha e Pakistanit është e para që po kërkon
heqjen e këtij ligji.” pohoi për mjetet e informimit imzot Kuts.