Benedikti XVI dhe vullneti i Zotit, kremtuar në liturgjinë e sotme
(20.07.2010 RV)“Ai që bën vullnetin e Atit tim që është në qiell, është për
mua vëlla, motër e nënë”. Kështu thotë Ungjilli i sotëm sipas Mateut, duke vënë në
dukje atë cilësi, njëkohësisht njerëzore e hyjnore, që Zoja e Bekuar dhe shenjtorët
e kanë bërë të shkëlqejë me intensitet të jashtëzakonshëm: respektimi i vullnetit
të Hyjit. Mbi këtë temë, Papa Benedikti XVI reflekton në homeli të shumta gjatë papnisë
së tij.
Në një natë të zakonshme të Nazaretit, një rrokje e thjeshtë bën
që të ulet hiri i Zotit mbi kryet e njerëzve. Një vajzë e re hap zemrën e ul kokën,
duke thënë veç “po” e, që nga ai çast, rrjedha e ngjarjeve mbi Tokë ndryshon përgjithmonë,
pasi jehona e atij pranimi, pa kundërshtime e dyshime – vërente Benedikti XVI para
disa vjetësh – i lejon akoma edhe sot Hyjit “të vizitojë njerëzimin me mëshirën e
vet”. Ajo “ja ku jam” absolute e Shën Marisë para Zotit është një nga imazhet më të
fuqishme të fesë së krishterë. E pas mëse 20 shekujsh nga ajo natë e Nazaretit, është
edhe më provokuesja. Sepse, në epokën aktuale të lirisë pa kufi e të kërkimit të të
drejtave, duke harruar detyrat, në një epokë ku ngritja në qiell e individualitetit
e ka plagosur rëndë thjeshtësinë e përvuajtërinë, ideja e një personi që e anullon
krejtësisht vullnetin e vet para një tjetri kuptohet pak e aq më pak, tolerohet: “Njeriu
nuk i beson Zotit. Ai dyshon se Hyji, në fund të fundit, i heq diçka nga jeta, se
Zoti është rival, që kufizon lirinë e se mund të jemi plotësisht qënie njerëzore vetëm
kur ta kemi lënë mënjanë; pra, se vetëm në këtë mënyrë mund ta realizojmë plotësisht
lirinë tonë. Njeriu jeton me dyshimin se dashuria e Zotit krijon varësi e se është
e nevojshme ta zhdukë këtë varësi për të qenë plotësisht vetvetja… Në vend të dashurisë,
i jep rëndësi pushtetit, me të cilin dëshiron të marrë në dorë në mënyrë autonome,
jetën e vet” (8 dhjetor 2005). Në këtë skenar, ndërmjet pushtetit e dijes,
jetuar sikur Zoti të mos ekzistonte, Maria e Nazaretit – përsërit shpesh Papa – bëhet
personifikimi i pushtetit dhe i dijes së Hyjit, që ekziston dhe e shndërron mrekullisht
atë njeri, që i thotë “po”: “Njeriu që e braktis krejtësisht veten në duart
e Zotit nuk bëhet buratin i Hyjit, një person i mërzitshëm, që është gjithnjë dakord;
ai nuk e humb lirinë e tij… Njeriu që kthehet nga Zoti nuk bëhet më i vogël, por më
i madh, sepse falë Hyjit e sëbashku me Të, bëhet i madh, bëhet hyjnor, bëhet vërtet
vetvetja. Njeriu që e lë veten në duart e Zotit nuk largohet nga të tjerët, duke u
mbyllur në kullën e tij të fildishtë; përkundrazi, vetëm atëherë zemra e tij hapet
vërtet dhe ai bëhet i ndjeshëm e pra, më i mirë e më i dashur” (8 dhjetor 2005). Njeriu
që e pranon Zotit, bëhet më i mirë e më i dashur, por edhe më i fortë e më i kujdesshëm,
siç dëshmon Jezu Krishti në takimin me Qoftëlargtin në shkretëtirë: “Jezusi,
në të kundërtën e kritereve njerëzore, vendos të vetmin kriter të vërtetë: bindjen
ndaj vullnetit të Hyjit. Edhe ky është mësim themelor për ne: nëse mbajmë në mendje
e në zemër Fjalën e Zotit, nëse ajo hyn në jetën tonë, mund t’i qëndrojmë çdo lloj
gënjeshtre të Tunduesit” (21 shkurt 2010). Nga Nazareti në Betlehem protagonistët
e parë të Ungjillit lëvizin në rrethana të ndryshme me një bindje të përbashkët: të
kuptojnë e të plotësojnë vullnetin e Zotit në çdo çast. Një vlerë kjo, që vetë Krishti
e mëson nga prindërit, vëren Benedikti XVI: “Në periudhën e kaluar në Nazaret,
Jezusi nderoi Shën Marinë Virgjër e Jozefin e drejtë, duke iu nënshtruar autoritetit
të tyre gjatë gjithë fëmijërisë dhe adoleshencës. Në këtë mënyrë, hodhi dritë mbi
vlerën parësore të familjes në edukimin e njeriut” (31 dhjetor 2006). Edhe
më i qartë është Papa, kur e lidh thirrjen për meshtari me respektimin e vullnetit
të Hyjit. Meshtari që nuk e kupton kështu misionin e vet, theksoi Benedikti XVI, jo
më larg se më 20 qershor të këtij viti, nuk e do vërtet Zotin e të tjerët, por vetëm
vetveten e paradoksalisht, e humb vetveten: “Meshtaria – ta kujtojmë gjithmonë
– themelohet mbi guximin për t’i thënë “po” vullnetit të tjetërkujt, me bindjen, që
duhet rritur çdo ditë, se nga respektimi i vullnetit të Zotit jo vetëm nuk do të zhduket
origjinaliteti ynë, por, përkundrazi, do të zhytemi gjithnjë e më thellë në të vërtetën
e qenies e të shërbimit tonë” (20 qershor 2010). Pra, thekson Papa, jeta e
njeriut pa fanarin e vullnetit të Hyjit është një rrugë pa dalje, e verbër. Për Atin
e Shenjtë, modeli është dhe mbetet ajo vajzë e vogël e Nazaretit, e cila i pat sugjeruar
këtë lutje, në përfundim të homelisë së parë të Benediktit XVI në Festën e Zojës së
Papërlyer: “Merr guxim të shkosh me Zotin! Provoje! Mos ki frikë prej Tij!
Merr guxim të rrezikosh me fenë! Merr guxim të rrezikosh me mirësinë! Merr guxim të
rrezikosh me zemrën e pastër! Kompromentohu me Zotin, atëherë do ta shohësh se kështu
jeta hapet e ndriçohet, nuk bëhet e mërzitshme, por mbushet me të papritura pa fund,
sepse mirësia e Zotit nuk ka fund kurrë!” (8 dhjetor 2005)