Վատիկանեան տեղեկութիւններ Վատիկանի արտգործ նախարարի այցելութիւնը՝ Լիբանան։ Միջին
Արեւելքի եպիսկոպոսական սիւնիոդոսի գումարումէն չորս ամիս առաջ(որ տեղի պիտի ունենայ
Վատիկան Հոկտեմբեր ամսոյն մէջ) Ս. Աթոռի արտգործ նախարարը` գերապայծառ Տոմենիք Մանպերթին
Լիբանան այցելած է յուլիս 1-6։ Ան տեսակցութիւն ունեցած է Մարոնիներու Պատրիարք գերերջանիկ
Նասրալլա Սֆէյրին հետ, կը կարդանք Վատիկանի կիսապաշտօն օրաթերթ Օսսերվադորէ Ռոմանոյի
յուլիս 18ի թիւին մէջ ։ Ան իր կեցութեան ընթացքին բազմաթիւ հանդիպումներ եւ տեսակցութիւններ
ունեցած է երկրի եկեղեցական ու քաղաքացիական իշխանութիւններու հետ։ Գերապայծառ Մանպերթին
մտահոգութեամբ ընդգծած է Միջին Արեւելքի ընդհարումներու շարունակութիւնը, ինչպէս նաեւ
քրիստոնեաներու դերը Լիբանան թէ Միջին Արեւելք, մատնանշելով թէ Լիբանանը անցեալին խորհրդանիշը
եղած էր համակեցութեան Միջին Արեւելքի ու համայն աշխարհին համար։