Në 100-vjetorin e lindjes së Nënë Terezës, ndërmjet motrave e vëllezërve të saj kundrues
në Romë
(19.07.2010 RV)Afrohet data e madhe e ditëlindjes së njëqindtë të së Lumes
Nënë Terezë, në kuadrin e së cilës, në të katër anët e botës shumëfishohen nismat,
kremtimet, shtegtimet në drejtim të viseve më të dashura për Themeluesen e Motrave
të Bamirësisë: në vendlindje, në Kishat që i deshi më shumë, në viset ku la jetën
peng në duart e të varfërve më të varfër, për hir të një dashurie, që i kapërcen kufijtë
e jetës e të vdekjes: dashurisë për Krishtin. Të gjitha shtëpitë e motrave të Nënë
Terezës, në të katër anët e botës, përgatiten të nisin, që më 1 gusht, veprimtaritë
përkujtimore. Po ndalemi sot në programin e kremtimeve të Motrave e të Vëllezëve Kundrues
të Bamirësisë, me qendër në Sheshin e Shën Gregorit, në Çelio të Romës, të cilët tashmë
e kanë shpërndarë në të katër anët progamin e tyre të kremtimeve. Titullohet: “Festa
e së Lumes Terezë të Kalkutës”, në njëqind vjetorin e lindjes, 26 gusht 2010.
Është dita, që i fali Kishës, botës e sidomos shqiptarëve, Gruan e vogël- aq të madhe,
njëqind vjet më parë, në një shtëpi të thjeshtë të Shkupit, në vatrën e një familjeje
me gjak shqiptar. Nga faqja e parë e programit, të shikon nga një fotografi,
si gjithnjë buzagaze, Nënë Tereza. Kremtimet do të nisin pikërisht me hapjen e
një ekspozite fotografike kushtuar jetës, veprave e mesazhit të së Lumes. Ekspozita
do të hapet në orën 17. 00, në Sheshin e Kancelerisë, n.1, në Romë e do të pasohet
nga Mesha solemne, kremtuar në Kishën e Shën Lorencit në Damaso, kryesuar nga kardinali
Anxhelo Komastri. Kremtimet do të vijojnë çdo ditë, nga data 26 gusht deri më
3 shtator, në shtëpitë e misionareve kundruese, në Rrugën Dragoncello, 68, Açilia,
ku do të fillojë edhe nëntëditëshi i lutjes. Në mjediset e vëllezërve kundrues të
bamirësisë, nga e marta, 31 gusht, e deri më 4 shtator do të kremtohet Adhurimi
i vazhdueshëm i Eukaristisë. Më 4 shtator në Kishën e Shën Gregorit në Çelio
do të kremtohen lutjet e mbrëmjes. Më pas, do të shfaqet një Oratorio kushtuar së
Lumes, me muzikë e tekst të Marçelo Bronxetit. Më 5 shtator, datë kur Motra
e Lume shqiptare u kthye në shtëpinë e Atit qiellor, në të gjitha shtëpitë e Misionareve
e Misionarëve të Bamirësisë, në Romë e në botë, do të kremtohen Meshë. Eukaristia
solemne, që do të kremtohet në Kishën e Shën Gregorit në Çelio, do të kryesohet nga
kardinali Ivan Dias e do të këndohet nga kori i famullisë së Orvietos. Më 11
shtator, pranë vëllezërve kundrues të bamirësisë, në rrugën Shën Agapito, 8, Largo
Preneste, Meshën do ta kryesojë kardinali Agostino Valini. Më 7 tetor kremtimet
do të arrijnë kulmin, e përfundimin: do të kremtohet Dita e Falënderimit, me rastin
e 60-vjetorit të themelimit të Kongregatës së Misionareve të Bamirësisë. Kremtimet
do të nisin me adhurimin e Eukaristisë, do të vijojnë me mbylljen festive të ekspozitës
fotografike e me Meshën e falënderimit, që do të kremtohet në Kishën romake të Shën
Lorencit në Damaso, kryesuar nga imzot Ernesto Mandara. Mesha do të shoqërohet nga
kori i lëvizjes së “Përtëritjes shpirtërore”. Për më shumë: www.motherteresa.org/centenary/program.html