Argjentina përçahet edhe më shumë, pas miratimit të bashkimeve homoseksuale.
(16.07.2010 RV)Votimi i së mërkurës së kaluar, përmes të cilit senati i Argjentinës
miratoi bashkimet homoseksuale, duke i konsideruar të mbrojtura me ligj e krejtësisht
të barabarta, me të drejtat e detyrat që kanë bashkimet e tjera martesore, bëri që
tensioni politik të arrijë një kulm shqetësues. Kështu Argjentina u bë vendi i
parë i Amerikës Jugore, që i hap rrugën bashkimeve homoseksuale. E pas një beteje
të gjatë ligjore mbi karakterin antikushtetues të ligjit të ri, sot ndjehet e prekur
në ndjenjat më të fisme kombëtare. Ky ligj, përveçse godet rëndë lidhjet ndërmjet
prindërve e fëmijëve, u mohon këtyre të fundit të drejtën e identitetit, atë që është
tejet e shtrenjtë për njeriun, të drejtën për të pasur një nënë e një baba. Kështu
senati i njohu mbrojtjen ligjore një bashkimi, që nuk varet nga vullneti i njeriut,
por nga ai i Zotit. Ky vendim, formalisht demokratik, mohon të drejtat natyrore, që
nuk kanë të bëjnë fare me pakica e as me shumica votash. Kështu nuk zgjidhet asnjë
problem. Përkundrazi, krijohen probleme të reja, ndërmjet të cilave, shkelja e të
drejtave të fëmijëve e dyshimet me karakter kushtetues, pa llogaritur dëmin e madhe
që i shkaktohet së mirës së përbashkët, duke pasur parsysh se sa më e fortë të jetë
familja, aq më e fortë është vetë shoqëria. E kjo nuk mund të mohohet nga shumica
kalimtare, si ajo që në Argjentinë, e miratoi ligjin me diferencë vetëm prej 6 votash,
në një kohë kur disa nga anëtarët e senatit, që ishin shprehur kundër martesave gei,
mungonin për arsye shtetërore në këtë votim kaq të rëndësishëm për fatet e së ardhmes
së një vendi, ku njerëzit i afrohen kutisë së votimit duke dëgjuar zërin e partisë,
e jo atë të ndërgjegjes. Gjë që nuk mund të mos i hapë rrugën shtetit totalitar.