Letra e Papës dërguar imzot Twal: katolikët e Tokës së Shenjtë të jenë shenjë e ndritshme
bashkimi në dashuri.
Faqja e internetit të Patriarkanës Latine të Jerusalemit ka botuar Letrën që Papa
i dërgoi më 7 qershorin e kaluar patrikut Fouad Twal me rastin e udhëtimit të tij
apostolik në Republikën e Qipros, udhëtim që u mbajt nga data 4 deri më 6 qershor.
Benedikti XVI falënderon imzot Twal “për pritjen e përzemërt” që i rezervoi gjatë
kësaj vizite. “Jam shumë i lumtur që pata mundësinë të konstatoja personalisht
- shkruan Papa - se si shumë katolikë qipriotë të traditës së lashtë të krishterë
latine kanë qëndruar besnik ndaj thesarit të tyre shpirtëror, falë kujdesit tuja baritor.
Ju lus t’u transmetoni atyre e ti siguroni për pjesëmarrjen time atërore në lutje
si dhe urimet e mia më të mira shenjtërimi e përparimi. Në të njëjtën kohë - vijon
Ati i Shenjtë Racinger - për mua ishte kënaqësi duke parë bashkësinë katolike se si
vazhdon të pasurohet me besimtarë të vendit të ritit latin e kështu edhe me emigrantë
të ardhur prej kontinenteve tjera, posaçërisht nga Evropa, Afrika e Azia. Lutja ime
drejtuar Zotit - përfundon Benedikti XVI - është që të gjithë katolikët e Tokës së
Shenjtë, me gjuhët e tyre, me doket e tyre dhe traditat e tyre përkatëse, të impenjohen
në bashkëpunimin e gëzueshëm si vëllezër e motra, e të jenë shenjë dalluese të një
Kishe të vetme, të shenjtë, katolike e apostolike”.