Беларусь і Мальтыйскі Ордэн выпусцілі агульную паштовую марку тыражом у 40 тысяч экзэмпляраў.
Гашэнне першай паштовай маркі, прысвечанай паштоваму пагадненню Беларусі і Суверэннага
Мальтыйскага Ваеннага Ордэна, адбылося ў штаб-кватэры Беларускага таварыства сяброўства
і культурных сувязяў з замежнымі краінамі. Як адзначыў першы ў гісторыі суверэннай
Беларусі святар і іерарх, які стаў Манахам Капеланам Мальтыйскага Ордэна, Мітрапаліт
Тадэвуш Кандрусевіч, "хоць Мальтыйскі Ордэн і не мае сваёй тэрыторыі, але гэта суб'ект
міжнароднага права і асобная дзяржава. Вельмі важна, што паміж нашымі краінамі развіваюцца
таварыскія адносіны. Мы ведаем дабрачынныя акцыі мальтыйскіх арганізацый, якія прыязджаюць
у Беларусь з гуманітарнай дапамогай. І той факт, што ад сённяшняга дня ў нас ёсць
свая паштовая марка, сведчыць пра тое, што нашы адносіны развіваюцца. Патэнцыял Мальтыйскага
Ордэна ў Беларусі яшчэ далёка не выкарыстаны. І я мяркую, што сённяшняя падзея — гэта
новы крок да выкарыстання гэтых новых магчымасцяў". — ... гэты дзень увойдзе ў
гісторыю нашага супрацоўніцтва, — адзначыў Надзвычайны і Паўнамоцны Пасол Суверэннага
Ваеннага Мальтыйскага Ордэна ў Рэспубліцы Беларусь Пауль Фрыдрых фон Фурхер. — Практыка
паказала, што ўсе заключаныя паміж намі дамовы заўсёды выконваюцца. Надалей плануем
пашырыць наша супрацоўніцтва ў гэтай галіне — выпуск чарговай маркі, другой па ліку,
адбудзецца ў Рыме ў найбліжэйшыя два гады, куды будуць запрошаныя прадстаўнікі "Белпошты"
і Міністэрства сувязі і інфарматызацыі Беларусі. Mастацкім афармленнем маркі займалася
Яўгенія Бядонік. — Над макетам маркі працавалі разам дызайнеры дзвюх паштовых адміністрацый,
— расказала намеснік міністра сувязі і інфарматызацыі Беларусі Ніна Гаўрылава. — Рэалізацыя
гэтага праекта — яркае пацверджанне нашага супрацоўніцтва. Спадзяёмся, што сумесны
выпуск паштовай маркі паслужыць далейшаму развіццю двухбаковых адносінаў, а таксама
стане ўпрыгожваннем калекцый філатэлістаў шэрагу краін. Дыпламатычныя адносіны
паміж Беларуссю і Суверэнным Ваенным Мальтыйскім Ордэнам былі ўсталяваны ў 1996 годзе.
Дамова аб абмене паштовымі адпраўленнямі паміж ведамствамі была падпісана ў Рыме ў
красавіку 2009 года. Абвестку зрабіў Ілля Лапато.