Benedikti XVI: liria fetare është rruga e paqës kundër fondamentalizmave.
“Lira fetare është rruga e paqës”. Kjo është tema e zgjedhur nga Benedikti
XVI për kremtimin e Ditës se 44-të Botërore për Paqën 2011 e cila, nga 1968 kremtohet
ditën e parë të çdo viti. “Nëpër botë ka forma të ndryshme kufizimi ose mohimi të
lirisë fetare, të diskriminimit ose të mënjanimit, të bazuara tek feja, madje këto
shkojnë deri tek persekutimi dhe dhuna kundër pakicave.” – thuhet në një komunikatë
të Sallës së Shtypit të Vatikanit që komenton temën e zgjedhur nga Papa Racinger. Nga
këndëvështrimi i krishterë, vijon nota e Selisë së Shenjtë, “duke qenë se liria fetare
është e rrënjosur tek vetë dinjiteti i njeriut dhe është e orientuar nga kërkimi i
së vërtetës së pandryshueshme, paraqitet si 'liria e të gjitha lirive'. Pra, liria
fetare është krejtësisht e tillë atëherë kur tregohet koherente me kërkimin e së vërtetës
dhe të së vërtetës mbi njeriun. Ky këndvështrim na tregon edhe kriterin bazë për dallimin
e fesë dhe të shfaqjeve të saj.” Sot ka shumë zona nëpër botë ku vazhdojnë të ekzistojnë
forma të ndryshme të kufizimit të lirisë fetare, dhe kjo ndodh si atje ku bashkësitë
fetare janë pakicë, ashtu edhe atje ku këto nuk janë pakicë, e megjithatë i nënshtrohen
disa formave të sofistikuara të diskriminimit dhe të mënjanimit nga shoqëria, në fushën
kulturore por edhe në jetën publike, civile dhe politike.” “Është e pakonceptueshme
që besimtarët duhet të ndrydhin brenda vetes një pjesë të tyre, besimin fetar, për
të qenë kështu qytetarë aktiv. Nuk duhet të jetë aspak e nevojshme të heqim dorë nga
besimi në Zotin për të gëzuar të drejtat që na përkasin.” - shpjegon nota e Sallës
së Shtypit të Vatikanit e cila citon Benediktin XVI. “Njeriu nuk mund të copëtohet,
nuk mund të ndahet nga ajo që beson sepse ajo tek e cila beson ndikon në jetën dhe
në personin e tij.” – theksohet në notë. Komunikata, e cila shtjellon temën e zgjedhur
nga Papa Benedikti XVI, na kujton se liria fetare “e përjashton fondamentalizmin,
manipulimin dhe instrumentalizimin e së vërtetës dhe të vërtetës mbi njeriun.” Po
ashtu, “gjithçka i kundërvihet dinjitetit të njeriut i kundërvihet edhe kërkimit të
së vërtetës dhe rrjedhimisht, nuk mund të quhet liri fetare.” - vazhdon nota e Sallës
së Shtypit të Vatikanit. Përkundrazi, Ati i Shenjtë Racinger na propozon “një
ide më të thellë të lirisë fetare që i zgjeron horizontet e humanizmit dhe të lirisë
së njeriut dhe bën që kjo të vendosë lidhje të thella me vetveten, me tjetrin dhe
me mbarë botën.” – përfundon nota e Sallës së Shtypit të Vatikanit. Papa Benedikti
XVI, në fjalimin e mbajtur pranë selisë së OKB-së në Nju Jork, më 18 prill 2008, pati
kërkuar që të drejtat e njeriut të përfshijnë edhe të drejtën e lirisë fetare, kuptuar
kjo si shprehje individuale dhe kolektive e shoqërisë, si një e drejtë e cila pasqyron
unitetin e individit, ndonëse e ka të qartë dallimin ndërmjet shtetasit dhe besimtarit.