Opozita le ta ngrejë të ri Komisionin Parlamentar Hetimor për Zgjedhjet, le të ketë
shumicën, por po dëshiroi të lexojë votat, le t'i drejtohet Strasburgut. Kështu vlerësoi
Kryeministri i Shqipërisë Sali Berisha sot në mbledhjen e grupit të Partisë Demokratike.
Kreu i qeverisë pasi iu referua Rezolutës për Integrimin e Shqipërisë që u votua pak
ditë më parë nga Parlamenti Evropian, garantoi se do të zbatojë rekomandimet që janë
në të. "Rezoluta ishte e qartë dhe angazhohem për zbatimin e saj". Berisha theksoi
se është gati të ngrejë komision hetimor të ri për hetimin e zgjedhjeve të qershorit
te vitit të kaluar, ku propozon që opozita të ketë shumicën në këtë komision. Por,
sa i përket votës, brenda në kutitë e votimit, Berisha përsërit se kjo nuk i takon
ta caktojë ai si kryeministër por Gjykatat. "Komisionin po të duan, le ta ngrenë
prapë, le ta kenë shumicën. Unë nuk kam kundërshtim të lexohet dhe vota, por kjo në
bazë të ligjit të Gjykatës Kushtetuese.PS le t'i drejtohet Gjykatës, në rast tjetër
edhe Gjykatës së Strasburgut". Sipas Berishës, kjo çështje duhet zgjidhur shpejt dhe
mirë, pasi po afrohen zgjedhjet lokale dhe shoqëria shqiptare, sipas tij duhet të
mbyllë çështjen e 28 qershorit dhe më pas tu drejtohet sërish kutive të votimit, këtë
radhë për zgjedhjet lokale.