Papa: Logjika e Krishtit është ajo dashurisë dhe e shërbimit
“Logjika e Krishtit është logjika e vet dashurisë: Hyji është dashuri, e ta nderosh
përmes kultit do të thotë t’u shërbesh vëllezërve me dashuri të sinqertë e bujari”.
Papa Benedikti XVI e komentoi kështu shëmbëlltyrën e njohur ungjillore të “Samaritanit
të mirë”, të cilën na propozon Ungjilli i kësaj së diele në liturgjinë e fjalës, “për
të na treguar se na takon ne të bëhemi e të jemi ‘ i afërmi’ i kujtdo që ka nevojë
për ndihmë”. Kjo shëmbëlltyrë ungjillore është një tekst themelor nga i cili del në
pah në mënyrë të qartë se “programi i të krishterit, marr nga mësimet e Jezusit, është
zemra që sheh dhe e di se ku ekziston nevoja për dashuri, e si pasojë vepron në mënyrë
të përshtatshme”. “Samaritani - u kujtoi Papa besimtarëve të mbledhur në oborrin
e rezidencës verore në Kastelgandolfo për lutjen e Engjëllit të Tënzot - mori mbi
vete përkujdesin për një të panjohur që ishte në ngushticë, të cilin cubat e kishin
lënë rrugës gati duke vdekur; derisa një prift e një levit duke kaluar po asaj rruge,
e anashkaluan e vijuan udhën më tej pa u ndaluar për ta ndihmuar, ndoshta duke menduar
se në kontakt me gjakun, në bazë të një urdhri e rregullore të asaj kohe, do të ishin
infektuar. Kështu, shëmbëlltyra e Samaritanit të Mirë duhet të na nxisë ta shndërrojmë
e ta përmirësojmë mentalitetin tonë”. Vërtet, “ky tregim ungjillor u ofron të
krishterëve ‘kriterin e masës’, do të thotë universalitetit e dashurisë që shikon
e përkujdeset për nevojtarin që e takojmë rastësisht kushdo qoftë ai”. “Pranë kësaj
rregullore universale, tha Papa, ekziston edhe kërkesa e veçantë kishtare: që pikërisht
në Kishën vet, si familje, asnjë anëtarë të mos vuaj për arsye se gjendet në nevojë”. “T’ia
besojmë Virgjërës Mari - përfundoi Papa meditimin e tij gjatë Lutjes së Engjëllit
të Tënzot në Kastelgandolfo -udhëtimin tonë të fesë e, në mënyrë të posaçme, këtë
kohë pushimesh, në mënyrë që zemrat tona t’i kenë gjithmonë parasysh Fjalën e Zotit
dhe vëllezërit në vështirësi”.