Kardinali Njumën do të shpallet i Lum në Kofton Park.
(05.07.2010 RV)Xhon Njumën do të shpallet i Lum nga Papa më 19 shtator, në
Kofton Park, pranë Redno, pikërisht atje ku u varros kardinali anglikan, më pas katolik.
Vendi i zgjedhur për lumnimin nga etërit e Oratorit të Birmingamit, themeluar nga
vetë Njumën, ka një vlerë të madhe simbolike, sepse këtu ai e shokët e tij vinin
për t’u prehur e për të shëtitur në mes të blerimit të kodrave Liki Hills. Redno është
edhe sot e kësaj dite vend shëtitjesh, lexohet në një notë, ku prehen besimtarët e
famullisë, nxënësit e shkollave të Oratorit e edhe shtegtarët, që shkojnë për t’u
lutur pranë varrit të Kardinalit. Prandaj etërit shpresojnë se Papa e mijëra besimtarët,
që do të marrin pjesë në lumnim, do të gjejnë në Redno të njëjtën paqe e të njëjtën
përvojë të përtëritjes shpirtërore, që gëzuan ata e themeluesi i tyre. Rruga, që do
të përshkojë Papa nga Redno në Oskot, do t’i krijojë mundësinë për të pasur një kuadër
të plotë të jetës së kardinalit Njumën, i cili duke u nisur nga Oksfordi, qytet ku
kishte studiuar e ku themeloi lëvizjen e tij, shkonte në Oskot, ku takohej me Ipeshkvin
Uajzmën, duke siguruar kështu me Birmingamin, lidhje të vazhdueshme, deri në vdekje.
Kujtojmë se Xhon Henri Njumën, teolog, filozof e kardinal anglez, lindi në
Londër, më 21 shkurt 1801 e vdiq në Edgbaston, më 1 gusht 1890. Mbetet një nga
prozatorët më të mëdhenj anglezë e, pa dyshim, më i madhi apologjist i fesë, që ka
nxjerrë ndonjëherë Britania e Madhe, tejet i vlerësuar edhe nga jo-katolikët. Mjafton
të kujtojmë se Xhon O’Brien, në një libër të titulluar “Kthime në fe që ia ndryshuan
faqen botës”, e krahason me Shën Palin, Shën Agostinin e Gillbert Keith Çesterton. Mbi
varrin e kardinalit Njumën lexojmë epitafin, që e shkroi ai vetë: “Ex umbris et imaginibus
in veritatem!”- “Nga errësira e nga simbolet, tek e vërteta”. U kthye në fenë
e krishterë, pasi lexoi veprën kushtuar zanafillës së krishterimit “Zhvillimi i doktrinës
së krishterë”, botuar në vitin 1845. Përmes studimit të kësaj vepre, arriti në përfundimin
se Kisha katolike është përkrahëse e arsyes.U largua, atëhere, nga Oksfordi e u vendos
në Birmingam. U shugurua meshtar katolik më 1847, në Romë, ku u njoh me figurën e
Shën Filip Nerit, që e mahniti aq, sa të ecte në gjurmët e tij, duke themeluar në
Angli Kongregatën e Oratorit. Ishte mik i ngushtë me një prozator tjetër të famshëm:
ipeshkvin e më pas kardinalin Nicolas Uajsmën, autor, ndërmjet shumë veprash të tjera,
i romanit të mirënjohur “Fabiola”, përkthyer shqip nga imzot Vinçenc Prennushi.