ஜூலை 04, நாளுமொரு நல்லெண்ணம்

ஜூலை 4 அமெரிக்க ஐக்கிய நாடு தன் விடுதலை நாளைக் கொண்டாடுகிறது. ஜூலை, ஆகஸ்ட் என்ற இரு மாதங்களில் மட்டும் 41 நாடுகள் தங்கள் விடுதலை நாளைக் கொண்டாடுகின்றன. விடுதலை என்பது என்ன? ஒரு சில எண்ணங்கள்:

நாம் செய்ய விரும்பியதை எல்லாம் செய்யும் உரிமை விடுதலை அல்ல, நாம் செய்ய வேண்டியதைச் செய்யும் உரிமையே விடுதலை.

ஆப்ரகாம் லிங்கன். (Abraham Lincoln)

பொருளாதார பாதுகாப்பு இல்லாமல், விடுதலை கிடைக்காது. பசியோடு, வேலையின்றி இருக்கும் மக்களே சர்வாதிகாரம் அமைய நல்ல அடித்தளம்.

பிராங்க்ளின் ரூசவெல்ட். (Franklin Roosevelt)

அடக்குபவர்கள் விடுதலையை ஒருநாளும் தாங்களாகவே அளித்ததில்லை. அடக்கப்பட்டோர் வலுக்கட்டாயமாகக் கேட்கும் போதுதான் அது கிடைக்கும்.

மார்டின் லூத்தர் கிங் ஜூனியர். (Martin Luther King Jr.)

தாக்க வரும் ஓநாயிடமிருந்து ஆயன் ஆடுகளைக் காக்கும் போது, தங்களுக்கு விடுதலை அளிப்பவரென ஆடுகள் ஆயனுக்கு நன்றி சொல்லும். தன் விடுதலைக்குத் தடையென்று அதே ஆயன் மீது ஓநாய் குறைகூறும்.

ஆப்ரகாம் லிங்கன். (Abraham Lincoln)