Papa ambasadorit të ri irakian: vuajtja e përbashkët e të krishterëve dhe e myslimanëve
mund ta fuqizojë dëshirën për paqe.
(02.07.2010 RV)“Vitet e fundit në Irak kanë qenë plot me akte tragjike dhune,
në kundërshtim të plotë me mësimet e islamit e të krishterimit. Janë kryer kundër
popullsive të pafajshme myslimane e kristiane. Të dyja palët vuajtën së bashku, e
pikërisht kjo vuajtje e përbashkët mund të shërbejë për të krijuar një lidhje të fuqishme,
duke forcuar vendosmërinë e myslimanëve dhe të krishterëve për paqe e pajtim”. Këtë
pohoi sot paradite Papa Benedikti XVI, duke i drejtuar fjalën ambasadorit të ri të
Republikës së Irakut, Habeb Mohamed Radi Ali Al-Sadr, të cilin e priti në Vatikan
për paraqitjen e letrave kredenciale.
Benedikti XVI kujtoi se irakianët, me
rastin e votimeve, mbajtur më 7 marsin e kaluar, i dhanë botës një sinjal të qartë,
duke zgjedhur rrugën e demokracisë. Përmes kësaj rruge, shtoi Ati i Shenjtë, populli
irakian dëshiron të jetojë në harmoni, në një shoqëri të drejtë, pluraliste, që i
respekton njëlloj të gjithë anëtarët e saj. Pavarësisht nga kërcënimet e atyre, të
cilëve nuk u pëlqen kjo udhë, irakianët u treguan vërtetë të guximshëm e të vendosur,
duke shkuar me shumicë drejt kutive të votimit. Tani duhet punuar me vrull për të
kompozuar, sa më shpejt të jetë e mundur, mozaikun politik irakian: “It is
to be hoped that the formation of a new government... Shpresojmë
se formimi i qeverisë së re do të realizohet sa më shpejt, në mënyrë që vullneti i
popullit për një Irak të sigurtë e të bashkuar, të mund të bëhet realitet”. Selia
e Shenjtë, e cila i ka konsideruar gjithnjë të shkëlqyera marrëdhëniet diplomatike
me Irakun, do të vijojë, për sa është e mundur, t’i sigurojë ndihmën, në mënyrë që
Iraku të zërë vendin legjitim si komb udhëheqës në zonë. Ata që u zgjodhën, shtoi
Papa, duhet të tregohen të guximshëm e të vendosur, për t’iu përgjigjur si duhet shpresave
të mëdha, që ka mbështetur në ta populli irakian: “The new government will
need to give priority to… Qeveria e re duhet t’i shikojë me përparësi
masat për përmirësimin e sigurisë në të gjithë sektorët e jetës, duke u kujdesur posaçërisht
për pakicat e ndryshme”. Ndërmjet të drejtave, që duhen respektuar plotësisht,
rëndësi të dorës së parë kanë liria fetare e ajo e kultit, sepse u krijojnë nënshtetasve
mundësinë të jetonë si njerëz të krijuar sipas shembëlltyrës së Krijuesit. Të krishterët
irakianë, shpjegoi më pas Papa, kanë të njëjtin shqetësim, që shprehu ambasadori i
ri: duhet të mbeten në trojet, ku u linden, në atdhe. Për ata, që u detyruan të emigrojnë,
shtoi Benedikti XVI, uroj të rikthehen sa më shpejt në Irak: "Since the earliest
days of the Church… Që në ditët e para të Kishës, të krishterët banuan
në trojet e Abrahamit, troje që janë pjesë e trashëgimisë së përbashkët të judaizmit,
krishterimit e islamit”. Urojmë, prandaj, nënvizoi Papa, që shoqëria irakiane,
në të ardhmen, të dallohet për bashkëjetesën paqësore, dëshirë e shpresë e përbashkët
e të gjithë atyre, që i kanë rrënjët thellë në fenë e Abrahamit. E, të mos harrojmë,
në këtë shoqëri të krishterët kanë një rol të rëndësishëm: “Altough Christians
form a small minority… Ndonëse të krishterët janë pakicë në gjirin
e shoqërisë irakiane, japin një kontribut të çmuar për rindërtimin e saj e për rifillimin
e zhvillimit të ekonomisë, përmes apostullimit në fushën edukative e shëndetësore;
impenjimi i tyre në projektet humanitare është ndihmesë vërtetë të nevojshme për rindërtimin
e shoqërisë”. Historia dëshmon se disa nga nxitjet më të frytshme
për të kapërcyer përçarjet, vijnë nga shembulli i burrave e i grave, të cilët humbën
jetën, duke zgjedhur rrugën e guximshme e paqësore të dëshmisë së vlerave të larta,
larg çdo dhune: “The names of achibishop Paulos Faraj Rahho, father Raghhed
Ganni… Emri i kryeipeshkvit Paulos Faraj Rahao, i atë Reghed Gani
e i shumë të tjerëve vijojnë të jetojnë, si shembuj të ndritshëm të asaj dashurie,
që i shtyu të japin edhe jetën për të tjerët”. Benedikti XVI kujtoi, në
përfundim, nismën e Selisë së Shenjtë për të ndihmuar Kishat vendase në të gjithë
zonën, Asamblenë e posaçme të ipeshkvijve për Lindjen e Mesme, që do të mbahet nga
10 deri më 24 tetori i ardhshëm: "This will provide a welcome opportunity
to explore… Do të jetë një mundësi për të vënë në dukje rolin dhe
dëshminë e të krishterëve në trojet e Biblës e do t’i japë një shtytje të re dialogut
ndërfetar, gjë që mund të kontribuojë shumë për arritjen e qëllimit të bashkëjetesës
paqësore ndërmjet besimtarëve të feve të ndryshme, duke e thelluar respektin e nderimin
reciprok ndërmjet tyre”.