Benedikti XVI i shkruan kard. Bertone. Një ndihmë e afërt për familjen e Zotit.
Papa Benedikti XVI, me anë të një mesazhi, i shpreh mirënjohjen bashkëpunëtorit të
vet më të ngushtë Sekretarit të Shtetit, kardinalit Tarçizio Bertone me rastin e 50-vjetorit
të meshtarisë së tij. Dioqeza e Piemontit është në festë dhe pret ardhjen e kardinalit
Bertone, që u pat shuguruar meshtar nga ipeshkvi i Ivresë, Imzot Albino Mensa. Kard.
Bertone do të vizitojë vendet ku ka kaluar e vepruar si meshtar, duke filluar nga
Bolengo, ku asokohe gjendej konvikti ndërkombëtar salezian dhe ku bashkia ka vendosur
t’i japë kardinalit titullin “Qytetar nderi”.
“Na duket e drejtë, që ndërsa
po kalojmë kohë të vështira ti ta sjellësh vështrimin tek disa gjëra më të gëzuara
të së kaluarës,” shprehet Papa Racinger në mesazhin e tij drejtuar kard. Bertone.
Më tej, Benedikti XVI kujton etapat kryesore të misionit të zhvilluar gjatë viteve
nga Sekretari i tashëm i Shtetit Bertone, duke nënvizuar “nderimin dhe pozitën e rëndësishme”
që gëzon edhe gjatë papnisë së Gjon Palit II, i cili e pati emëruar kryeipeshkëv të
Verçelit, por edhe më vonë kur kryente detyrën e sekretarit të Kongregatës së Vatikanit
për Doktrinën e Fesë, e kur ndërmjet kard. Bertones e kard. Jozef Racinger, epror
i tij, nisi një miqësi e sinqertë.
Benedikti XVI e mbyll mesazhin e vet duke
shprehur konsideratën si dhe shkaqet që e shtynë të zgjidhte kard. Bertone si Sekretar
të Shtetit të Vatikanit, siç thotë Ai, “për të marrë bashkë vendimet e për të ndarë
detyrat”. “Pa dyshim, - vijon më tej Papa , - ti po punon mjeshtrisht, me mish e shpirt
si pjesëmarrës në projektet tona baritore që kanë të bëjnë me Kishën Universale dhe
në nismat Tona që i drejtohen mbarë botës, në mënyrë që familja e Zotit të forcohet
e bota të bëhet më e harmonishme.”
Ndër kremtimet e këtyre ditëve që do të
kenë si protagonist kard. Bertone bie në sy ai i së nesërmes në Shenjtëroren e malit
Stela në Itali, ku Sekretari i Shtetit do të kujtojë Meshën e parë kremtuar pesëdhjetë
vjet më parë. Pastaj, të shtunën, në Ivrea, do të zhvillohet bashkëkremtimi eukaristik
i jubileut të meshtarëve dioqezanë dhe të dielën, më 4 korrik, do të kremtohet Mesha
në kishën famullitare të Romano Kanaveze, qyteti ku ka lindur kardinali, më 1 dhjetor
1934 dhe ku jetojnë të afërmit e tij.
Sidoqoftë, momenti kulmor i kremtimeve
do të jetë në Romë, me Meshën e kryesuar nga vetë kard. Bertone, më 6 korrik, në orën
17.30, në bazilikën e Shën Pjetrit në Vatikan.