Utangazaji wa Neno la Mungu, Tasaufi ya Damu Azizi ya Kristo na maisha ya Kijumuiya changamoto kuu kwa viongozi wapya!

Shirika la Wamissionari wa Damu Azizi ya Yesu, Vikarieti ya Tanzania, katika mkutano wa uchaguzi mkuu, wamewachagua viongozi watakaoliongoza Shirika katika awamu ya nne, kipindi cha mpito kuelekea ukomavu kamili, utakaoliwezesha Shirika kujitegemea katika maisha na mikakati yake ya kichungaji.

Mheshimiwa Padre Felix Mushobozi, C.PP.S, Katibu wa Shirika la Wamissionari wa Damu Takatifu ya Yesu, kwa niaba ya Makao Makuu ya Shirika, anawapongeza viongozi waliohitimisha muda wao wa kuliongoza Shirika na kuwakaribisha viongozi wapya, akiwataka zaidi kujikita katika nguzo kuu tatu: Utangazaji wa Neno la Mungu; tasaufi ya Damu Azizi ya Kristo, itakayowawezesha wanashirika kusikiliza na kujibu "Kilio cha damu" katika ulimwengu wa leo na kwamba, nguvu za kuweza kusonga mbele katika maisha na utekelezaji wa mikakati yao ya kichungaji zinafumbatwa katika maisha ya Kijumuiya katika msingi wa mshikamano wa upendo.

Mheshimiwa Padre Felix Mushobozi anaendelea.

Mnamo tarehe 17 mwezi huu wa Juni, Wamisionari wa Damu Azizi ya Yesu walipokutana katika mkutano mkuu wa Uchaguzi walimchagua Pd. Reginald Mroso kuwa Mkuu mpya wa shirika Tanzania. Katika mkutano huo walichaguliwa washauri wake: Pd. Gregory Mkhotya kuwa naibu wake, Pd. Eugene Nchimbi kuwa Katibu, Pd. Thomas Wambura katika nafasi ya uhasibu na Pd. Egidius Seneda kama mshauri.

Kwa niaba ya Halmashauri ya Shirika Ulimwenguni yenye makao makuu hapa mjini Roma, napenda kutoa salamu zangu za pongezi kwa kuteuliwa kwao kulitumikia shirika katika sehemu hii ya Afrika. Ni takriban miaka kumi na miwili toka sehemu hii ya shirika iwe Vikariati (yaani hatua moja kabla ya kuwa Province).

Nachukua nafasi hii kuwashukuru viongozi ambao walikuwa madarakani kwa jitihada zao za kuhamasisha Wanashirika katika maisha ya jumuiya, katika kuendeleza tasaufi ya Damu Azizi ya Yes una kuratibu mipango mabalimbali ya utume na uchungaji. Tunapoongea sasa hivi Wamisionari wa Vikariati ya Tanzania wanafanya kazi katika nci mbali mbali ulimwenguni: Italia, Amerika ya kaskazini (USA), Chile, Colombia na Guinea Bissau.

Kama kwa mamna moja shirika limepiga hatua katika kukomaa katika utambuzi wa yale yanayotufanya kuwa Wamisionari wa Damu Azizi ya Yesu, kv. Maisha ya jumuiya, tasaufu ya Damu Azizi ya Bwana wetu Yesu Kristo na Umisionari; changamoto katika kuelekea ukomavu endelevu bado ni nyingi.

Matamanio ya halmashauri ya shirika hapa makao makuu ni kuona shirika katika Tanzania na mahali pengine tunapofanyakazi, linaendeleza Karama tulizorithishwa na Mwasisi wetu Mt. Gaspari, yaani kuhubiri neno la Mungu, hasa kuwasogeza watu wa Mungu karibu na Mto wa Rehema yaani Damu iliyomwagika Msalabani wakaoshe mavazi yao yawe meupe tayari kumlaki Mwanakondoo atakapokuja siku ya Mwisho.

Uongozi ulio bora ni ule unaotafuta kutimiza lengo hili kwa ufanisi kwa kupanga kimahiri na pamoja malengo na kuyatimiza kwa mshikamano mkuu. Kwa bahati njema, kadiri ya katiba na kanuni zetu mamlaka katika shirika hayamo mikononi mwa viongozi bali katika wanashirika wanapokaa na kupanga na kuamua maisha ya shirika kwa pamoja. Bila shaka viongozi hawa waliochaguliwa wanatambua hili na ndio maana wamechaguliwa.

Kazi yao itakuwa rahisi kama wataweza kutimiza vyema kazi ya kuwa viungo vya maisha ya jumuiya, wakijitahidi kuwa “facilitators’ wa yale yaliyoamuliwa na wanashirika wakijitahidi kuwa macho ya kuona mbele na kuwaongoza wanashirika wapange na kutimiza wajibu na utume wao kwa uaminifu na ufanisi.

Kinyume cha hapo uongozi utakuwa mgumu kama wakijaribu kufanya yote peke yao au kuweka pembeni yaliyoamuliwa na jumuiya na kuamrisha yatimizwe. Watafaulu katika uongozi wao ikiwa watasaidia wanajumuiya waweze kujiuliza maswali yaliyo sahihi na wakijitahidi kukumbuka kuwa majibu ya maswali sahihi hupatikana katika kujiuliza maswali hayo kwa pamoja. Tunawapongeza na kuwatakia Baraka za Mwenyezi Mungu katika utume wao huu mpya.

Pd. Felix Mushobozi, C.PP.S., Katibu Mkuu wa Shirika.