Benedikti XVI themelon një dikaster të ri për riungjillëzimin e Perëndimit.
Më 28 qershor Papa Benedikti XVI njoftoi se ka themeluar një Dikasteri të ri të Vatikani,
Këshillin Papnor për Ungjillëzimin e ri – që ka si qëllim ungjillëzimin e ri të vendeve
që kanë qenë të krishtera e tani janë kthyer e bërë pré e shekullarizimit, që e refuzon
dhe fsheh kuptimin e Zotit, me një fjalë, një Këshill Papnor për Ungjillëzimin e vendeve
perëndimore. Papa gjatë homelisë së mbajtur në bazilikën e Shën Palit, në kremtimin
e mbrëmësores së solemnitetit të Shenjtorëve Pjetër e Pal, foli për një organizëm
të ri, të cilin ia besoi kryeipeshkvit imzot Rino Fizikelës, kryetar i Akademisë Papnore
për jetën. “Kisha në botë është një forcë e jashtëzakonshme ripërtëritëse, sigurisht
falë jo forcave të saj por forcës së Ungjillit në të cilin është i gjallë Shpirti
i Shenjtë i Zotit, Hyji krijues dhe shëlbues i botës” i vetmi që mund të shuajë urinë
më të madhe që ka njeriu. Në homelinë e Mbrëmësores së solemnitetin të Shën Pjetrit
e Shën Palit, Benedikti XVI kujtoi shkakun, i cili që në fillim, e ka shtyrë Kishën
për të ungjillëzuar: “Edhe njeriu i mijëvjeçarit të tretë që dëshiron një jetë
të vërtetë dhe të plotë, që ka nevojë për të vërtetën, për një liri të madhe, për
dashuri falas. Edhe në shkretëtirat e botës së shekullarizuar, shpirti i njeriut ka
etje për Zotin, për Zotin e gjallë.” Më tej Papa theksoi se sot ka zona të
botës që ende nuk janë ungjillëzuar. Ka të tjera vende që janë ungjillëzuar një herë,
por kanë nevojë për një punë më të thellë. Prapë, ka të tjera vende ku ungjilli ka
lëshuar rrënjë të thella prej kohësh, duke krijuar një traditë të vërtetë të krishterë,
po ku, gjatë shekujve të fundit, sipas disa dinamikave të ndërlikuara, procesi i shekullarizimit
ka shkaktuar një krizë të thellë të kuptimit të besimit të krishterë dhe të përkatësisë
kishtare: “Në këtë perspektivë – shtoi në vijim Papa Benedikti XVI
– vendosa të krijoj një organizëm të ri, në formën e një Këshilli Papnor, me detyrë
parësore atë të promovimit të një ungjillëzimi të ri të vendeve ku kumtimi i Lajmit
të Mirë është dhënë me kohë dhe ku janë të pranishme Kisha të hershme, por që po përjetojnë
një shekullarizim përherë në rritje të shoqërisë dhe një lloj “eklipsi të kuptimit
të Zotit”, të cilat përbëjnë një sfidë për gjetjen e mjeteve të përshtatshme për të
propozuar edhe një herë të vërtetën e përjetshme të Ungjillit të Krishtit.”
I
pranishëm në kremtimin eukaristik edhe një delegacion i Patriarkatit ekumenik të Kostandinopojës,
dërguar nga Bartolomeu I, i përbërë nga metropoliti i Sasimës Genadios, peshkopi i
Ariancos, Bartolomaios, ndihmës i Metropolitit të Gjermanisë dhe diakoni i Selisë
së Patrikut të Fanarit, Teodoros Meimaris. Delegacioni në fjalë u prit në audiencë
nga Papa Racinger sot paradite. Papën në Bazilikën e Shën Palit e pritën kryeprifti
i bazilikës, imzot Françesko Monterizi, dhe Abati i kishës Dom Edmund Pauer. Përpara
fillimit të kremtimit të Mbrëmësores Benedikti XVI zbriti për të nderuar varrin e
Apostullit të Popujve Shën Palit që gjendet brenda në bazilikë.