Hapa përpara në marrëdhëniet ndërmjet Selisë së Shenjtë e Vietnamit: Papa do të emërojë
një përfaqësues jo rezident në Vendin aziatik.
(27.06.2010 RV)Së shpejti Papa do të emërojë përfaqësuesin e tij jo rezident
në Vietnam. Është ky hapi kuptimplotë përpara në marrëdhëniet diplomatike ndërmjet
Selisë së Shenjtë e vendit aziatik, arritur pas takimit të dytë të grupit të përbashkët
të punës, në të cilin merrnin pjesë përfaqësues të të dy shteteve, organizuar në
Vatikan, më 23 e 24 qershor 2010. Hapi i parë për t’i thelluar më tej këto marrëdhënie,
që nisën me takimin e grupit të parë të përbashkët të punës, në Hanoi, në shkurt 2009
e vijuan me takimin ndërmjet Benediktit XVI e Presidentit të Vietnamit Nguien Minh
Triet, në dhjetor 2009, lexojmë në një notë zyrtare, është emërimi nga ana e Papës,
i një përfaqësuesi jo rezident të Selisë së Shenjtë në Vietnam. Gjatë dy ditëve
të punës në Vatikan, pohohet në dokumentin zyrtar, delegacioni vietnamez kujtoi se
në vendin aziatik tashmë ndiqet vija politike e respektimit të lirisë së fesë e të
besojmës e se janë bërë hapat ligjore për ta garantuar e për ta vënë në jetë një vijë
të tillë. Delegacioni i Selisë së Shenjtë kërkoi të krijohen kushte të reja, që
e mundësojnë Kishën të marrë pjesë më gjallërisht në zhvillimin e vendit, posaçërisht
në fushën shpirtërore, edukative, shëndetësore, shoqërore e bamirëse. Kujtojmë
se termi rezident përdoret në diplomaci për përfaqësues diplomatikë, që janë në një
shkallë më të ulët se ministri fuqiplotë.