Atë Lombardi për hetimet që kanë të bëjnë me kardinalin Sepe: kemi besim se gjendja
do të sqarohet shpejt
(21.06.2010 RV)Kardinali aktual i Napolit, Kreshencio Sepe, ish-prefekt i Kongregatës
për Ungjillëzimin e Popujve (Propaganda Fide), akuzohet nga Prokura e Peruxhas në
Itali për korrupsion në tenderat e të ashtuquajturave “ngjarje të mëdha”. Çështja
e parë për të cilën ai duhet të përgjigjet para gjykatës, është shtëpia e dhënë për
përdorim kreut të Mbrojtjes Civile Italiane, Guido Bertolazo, me të cilën kardinali
deklaron se nuk është marrë deri në fund. Rasti i dytë ka të bëjë me shitjen e një
pallati në Romë, politikanit Pietro Lunardi, me një çmim më të ulët se ai i tregut.
Kardinali shpjegon se pallati në fjalë ishte i vjetër dhe në të banonin persona të
tjerë, prandaj çmimi u ul për këtë arsye. I treti, punimet për sigurinë e një faqeje
muri të vetë pallatit ku e ka selinë Kongregata për Ungjillëzimin e Popujve, një pjesë
prej të cilave është paguar nga shteti italian. Edhe këtu, imzot Sepe deklaron se
teknikët verifikuan përgjegjësinë e shtetit italian në dëmtimin e murit, pasi poshtë
pallatit kalon metroja e Romës. Për hetimet që po kryhen, zëdhënësi i Selisë së
Shenjtë, atë Federiko Lombardi bëri këtë deklaratë në mikrofonin tonë: Para së gjithash,
dëshiroj të them fjalë vlerësimi e solidariteti me kardinalin Sepe, në këtë çast të
vështirë. Kardinali Sepe është një person, i cili ka punuar e punon për Kishën dhe
për popullin, që i është besuar, intensivisht e bujarisht, prandaj ka të drejtë të
respektohet e të vlerësohet. Natyrisht, urojmë të gjithë që situata të sqarohet plotësisht
e me shpejtësi, të zhduken hijet, si nga vepra e tij, ashtu edhe nga institucionet
kishtare. Kardinali Sepe – siç ka thënë vetë – do të bashkëpunojë për sqarimet e rastit.
Duhet të mbajmë parasysh edhe aspektet procedurale dhe profilin juridik të marrëdhënieve
korrekte ndërmjet Selisë së Shenjtë dhe Italisë, që kanë të bëjnë me këtë episod.