Akoma të vdekur në Irak: atentate kundër aktiviteteve financiare
(21.06.2010 RV)Nuk ndalet vala e dhunës kundër institucioneve dhe aktiviteteve
financiare në Irak. Dje, një atentat i dyfishtë shkaktoi vdekjen e mëse 30 vetëve.
Nuk janë vjedhur para, prandaj, qëllimi është dëmtimi sa më i madh i ndërtesave dhe
i veprimtarisë së tyre. Sot, një kamikaze vrau 8 vetë në veri të vendit, ndërsa një
javë më parë u sulmua Banka Qendrore në Bagdad. Mbi situatën irakiane, të dëgjojmë
pedagogun e marrëdhënieve ndërkombëtare në Universitetin e Milanos, Alesandro Kolombo: Është një moment
natyrisht shumë delikat, për të cilin kishte paralajmërime prej muajsh. Të paktën
dy, janë arsyet që e bëjnë të ndërlikuar procesin e tranzicionit në Irak. Nga njëra
anë, ekziston një amulli politike, rezultat i zgjedhjeve të disa javëve përpara, nga
të cilat akoma nuk ka dalë një qeveri, madje marrëdhëniet ndërmjet dy blloqeve kryesore
janë ashpërsuar. Nga ana tjetër, po afrohet dita e tërheqjes amerikane nga vendi,
megjithëse nuk do të jetë largim i përgjithshëm. Këto dy gjëra e bëjnë të brishtë
procesin e tranzicionit, duke u hapur rrugën përpjekjeve për rritjen e tensionit.