(17.06.2010 RV)Të dashur dëgjues, të dielën e ardhshme, Papa Benedikti XVI
kremton në Vatikan Meshën për shugurimin e 14 meshtarëve, të cilëve, që nga ai moment,
u besohen besimtarët, u besohet grigja e Krishtit, bëhen barinj të saj. Shpesh dëgjojmë
ta thërrasin meshtarin “bari”. Ku e ka origjinën kjo fjalë dhe cili është kuptimi
i saj, sipas Biblës? Kësaj pyetjeje do t’i përgjigjemi në emisionin e sotëm.
Rruga
mbizotëruese për të folur mbi Zotin është ajo simbolike e Bibla është dëshmi e gjallë,
e vazhdueshme dhe tërheqëse për këtë. Fillohet nga shenja konkrete të botës, ose nga
përvoja dhe gjenden në to elemente, që mund të na udhëheqin drejt lartësive, drejt
plotësisë e përkryerjes, drejt Zotit. Dihet se populli hebraik ishte endacak, prandaj
i lidhur me jetën e barinjve, shpesh në antitezë me atë sedentare: është emblematike
skena e Abelit bari dhe e Kainit bujk, me përfundimin e saj tragjik. Bibla tregon
shpesh një lloj nostaligjie për nomadizmin, edhe duke u bazuar në ngjarjet e eksodit,
kur Izraelit iu desh të endej për 40 vjet në stepat e Sinait. Por të kthehemi në
simbolizmin baritor e në zbatimin e tij teologjik, që i referohet Zotit, i cili në
Besëlidhjen e Re quhet “Bariu i madh i deleve” (Heb 13,20). Në këtë imazh,
dy janë kompenentet themelore. Nga njëra anë, bariu udhëheq grigjën. Siç thotë Psalmi
23, “thupra jote dhe kërraba për mua janë ngushëllim” (v.4) e udhëheqin përmes
luginës së hijes së vdekjes. Ose, siç thotë Jezusi, bariu “u prin dhe delet i shkojnë
mbas, se e njohin zërin e tij” (Gjn 10,4). Nga ana tjetër, ekziston një element
tjetër i rëndësishëm, që nuk vihet re shpesh: bariu është shoku i jetës dhe i udhëtimit
të grigjës së vet. Gjithnjë në Psalmin 23 pohohet “s’trembem nga e keqja, sepse
ti je me mua”. Bariu nuk shpëton më parë vetveten, nuk e shuan urinë, ose etjen
pavarësisht nga grigja e tij, por jeton me të. Duke përdorur një imazh të veçantë,
që ka të bëjë me botën e barinjve, atë të rrëshiqit, me ujin e nevojshëm për të shkuar
nga një oaz në tjetrin, pslamisti pohon se Bariu hyjnor “lotët e mi mbledh në rrëshiqin
e vet” (shih Ps 56,9), duke penguar kështu që vuajtjet ta humbin kuptimin e tyre.
Madje, Jezusi deklaron se bariu “jep jetën për delet”. Simbolizmi ka shpesh
dy anë, që vendosen kundër njëra-tjetrës, në mënyrë që kuptimi të dalë nga krahasimi,
nga paradoksi. Na e mëson këtë profeti Ezekiel, kur në kapitullin 34 të librit të
tij përvijon sjelljen e barinjve të Izraelit, ose të krerëve politikë e fetarë, të
cilët shqetësohen “të ushqehen me qumësht, të vishen me lesh, të presin berret
e majme…por të ligshtën nuk e përtërijnë, të sëmurën nuk e shërojnë, të thyerën nuk
e lidhin, të ndarën nuk e kthejnë” (shih 34,3-4).Ndërsa, në Ungjillin sipas Gjonit,
bariu vihet në antitezë me mercenarin: në orën e rrezikut, ky i fundit përpiqet të
shpëtojë vetëm veten. Ndoshta edhe Jezusi aludon për meshtarët, skribët, politikanët
e kohës e xelotët, për rebelët antiromakë, të gjithë gati të arrijnë e të mbrojnë
qëllimet e interesat e veta, por jo të japin jetën për grigjën, pa dyshim. Bariu
i mirë – ose siç thotë teksti grek i kapitullit 10 të Ungjillit sipas Gjonit, “bariu
i bukur” – është ai që e njeh dhe e do grigjën e vet. Ky është modeli, nga i cili
duhet të marrin shembull edhe barinjtë e Kishës, siç kanë bërë, duke filluar nga Shën
Pjetri, që merr misionin për të kullotur delet e grigjës së Krishtit (Gjn 21,15-17).
E pikërisht shën Pjetri është ai që i këshillon barinjtë e Kishës “ruani grigjën
e Hyjit që ju është lënë në kujdes, mbikqyrnie jo përdhunë, por vullnetisht, si do
Hyji; jo për hir të fitesës së ndytë, por me shpirt gatishmërie, jo si zotërues mbi
ata që ju janë besuar, por si shembull i grigjës” (1Pjt 5,2-4).