Imzot Tomazi në OKB-në e Gjenevës: me kura e asistencë shëndetësore mund të shpëtohen miliona nëna e fëmijë

(16.06.2010 RV)I jashtëzakonshëm: kështu e quan Vëzhguesi i perhershëm i Selisë së Shenjtë në selinë e OKB-së në Gjenevë, imzot Silvano Maria Tomazi, numrin e nënave që vdesin gjatë lindjes në të gjithë botën. Kjo shifër është 350 mijë, që do të thotë po aq fëmijë jetimë. Edhe më impresionuese është shifra e fëmijëve, që nuk arrijnë të mbijetojnë pas lindjes. Tre milion nuk jetojnë më shumë se një javë, ndërsa 2 milion vdesin çdo vit, gjatë 12 muajve të parë të jetës.
Duke vënë në dukje ndryshimet ndërmjet vendeve të pasura e të varfëra, imzot Tomazi theksoi se vdekshmëria foshnjore është ulur ndjeshëm aty ku janë rritur të ardhurat për frymë, aty ku gratë arsimohen dhe aty ku ekziston mundësi më e madhe për kura mjekësore bazë. Kjo është rruga për t’u ndjekur, por Vëzhuesi i Vatikanit specifikon edhe më tej. Nevojiten kura obstetrike të emergjencës, personel kompetent, gjak i painfektuar, furnizim me ujë të pijshëm e me ilaçe, sidomos antibiotikë e ilaçe kundër Sidës. Gjithashtu, duhet caktuar një moshë prej të paktën 18 vjetësh për martesë dhe këto masa duhen marrë seriozisht nga shtetet, qeveritë dhe organizatat jo qeveritare.