Pedofilia. Ipeshkvijtë e Evropës, për problemin dramatik: jemi me Papën.
Në takimin e kohëve të fundit të sekretarëve të përgjithshëm të konferencave ipeshkvnore,
mbajtur këto ditë në Romë, të pranishmit theksuan se është tejet e nevojshme të pranohet
dramaticiteti i problemit të shpërdorimeve mbi të miturit nga ana e meshtarëve, duke
pohuar rëndësinë që ka përballimi i tij me seriozitetin më të madh. Është e qartë
– pohohet në një notë përfundimtare të Këshillit të Konferencave Ipeshkvnore Evropiane
(CCEE) - se Konferencat ipeshkvnore duhet të ndjekin rrugën, në të cilën po ecën Papa,
për të përballuar këtë çështje dramatike. Të bëjnë përshtypje të thellë – shton
dokumenti – masat që po marrin disa konferenca ipeshkvnore për të përballuar problemin,
posaçërisht për të parandaluar rrezikun e rasteve të reja si dhe për t’i shoqëruar
viktimat e familjet, që po jetojnë pasojat e këtij shpërdorimi, i cili u dënua njëzëri.
E, gjatë takimit, u kujtuan edhe procedurat që duhen ndjekur, sa herë që një ipeshkëv
të njoftohet për raste të reja të mundshme shpërdorimesh. Sekretari i Kongregatës
për Doktrinën e Fesë, imzot Luis Ladaria Ferrer, i pranishëm në takim, theksoi se
konferencat ipeshkvnore duhet të shkëmbejnë përvojën, për të siguruar kështu, përmirësimin
e ndërhyrjes së Kishës në një sektor kaq delikat. Në takim u trajtua edhe tema e marrëdhënieve
të Kishës me mjetet e komunikimit. Drejtori i Sallës vatikanase të Shtypit, atë Federiko
Lombardi, u kujtoi ipeshkvijve të pranishëm se duhet ta kenë mirë parasysh globalizimin
e informacionit, që vijon të jetë gjithnjë më i shpejtë e më sensacionalist, duke
bërë ç’është e mundur që çdo deklaratë në nivel lokal, të ketë sa më shpejt jehonë
ndërkombëtare. Zëdhënësi i Konferencës ipeshkvnore italiane, imzot Domeniko Pompili,
vuri theksin mbi nevojën që Kisha vetë të jetë e pranishme në mjetet e reja të komunikimit. Në
këtë takim, në emër të Konferencë Ipeshkvnore të Shqipërisë, mori pjesë ipeshkvi i
Sapës, imzot Lucjan Avgustini, i cili foli për aspektet e ndryshme dhe sfidat e Kishës
katolike në Shqipëri.