Mesazhi i kardinalit Peter Turkson Këshillit Kombëtar të Ekonomisë dhe Punës: ekonomia
të jetë gjithmonë në shërbim të njeriut.
(15.06.2010 RV)Të vihet njeriu në qendër të proceseve ekonomike. Kjo është
thirrja që bëri kryetari i Këshillit Papnor “Drejtësi dhe Paqë”, kardinali Peter Turkson,
në mesazhin dërguar takimit të Këshillit kombëtar të Ekonomisë dhe Punës mbi ndërmarrjet
shoqërore, mbajtur dje në Romë. “Është bindje e thellë e Papës, thuhet në mesazhin
e kard. Turkson, që ekonomia të jetë në shërbim të njeriut dhe të shoqërisë, në mënyrë
të veçantë atëherë kur, frymëzohet nga etika e një vëllazërimi të vërtetë.” Në takim
foli edhe Imzot Mario Tozo që e vuri theksin tek ana vëllazërore e ekonomisë. Sekretari
i Këshillit Papnor “Drejtësi dhe Paqë” kërkoi gjithashtu edhe realizimin e një rendi
të ri politik ndërkombëtar, i cili në një botë gjithnjë e më të globalizuar duhet
të promovojë një ekonomi që është në shërbim të njeriut.
“Kisha përballë forcave
të mëdha që godasin kryesisht më të varfërit, dëshiron të bashkëpunojë me shtetet
dhe institucionet civile për themelimin e një qeverisjeje botërore, bazuar tek përgjegjësitë
dhe pjesmarrja e të gjithëve.” vë në dukje mes tjerash kard. Peter Turkson në mesazhin
e vet dërguar takimit të Këshillit Kombëtar Italian të Ekonomisë dhe Punës. “Njerëzimi
ka hyrë në një fazë të re, në hijen e një kapitalizmi të ri planetar.”- u theksua
në takim, dhe në këtë kohë krize dhe shndërrimesh radikale sipërmarrjet shoqërore
tregojnë rrugën e drejtë ku duhet ecur për të caktuar rregulla të reja për një aleancë
të re ndërmjet etikës dhe ekonomisë. Ndërsa Imzot Mario Tozo nënvizoi faktin se sot
vihet re “një asimetri ndërmjet botës së globalizuar dhe politikës dhe pikërisht kjo
asimetri është rrënja e krizës që ka ardhur si pasojë e mungesës së rregullave dhe
të kontrolleve. Kështu, pra politika duhet të rimarrë kontrollin për ndërtimin e një
“rendi të ri botëror” dhe për “një reformë të sistemit ekonomiko-financiar, cili duhet
t’i kthejë etikës vendin e merituar.” përfundoi Imzot Tozo.
Ndërsa kryetari
i Këshillit Kombëtar për ekonominë dhe punën, Antonio Marcano vuri në dukje se sot
ndonëse nuk ka konkurrentë nëpër ekonomitë e planifikuara, ekonomia tradicionale e
tregut është në krizë dhe karakterizohet nga pasiguria, mbi të gjitha për ata që gjenden
anash aktivitetit ekonomik, pra për të moshuarit, të rinjtë dhe të papunët. Sidoqotë
mungon një projekt për Perëndimin. Nga ky këndvështrim, “çështja e mënyrës së sjelljes
së operatorëve të tregut është themelore.” shtoi Marcano. “Përmirësimi i ekonomisë
është ende i brishtë dhe i ngadaltë. E megjithatë është e nevojshme të rikthehet besimi
i njerëzve.”- vuri në dukje gjatë fjalës së tij sekretari i përgjithshëm i Organizatës
për Bashkëpunimin dhe Zhvillimin Shoqëror Angel Gurria, i cili i përkufizoi sipërmarrjet
shoqërore si një nga instrumentet më strategjike për përtëritjen ekonomike dhe për
promovimin e përgjegjësisë dhe të pjesmarrjes së njerëzve.