Papa në audiencën e përgjithshme, për shtegtimin në Qipro: “ngjarje historike”.
(09.06.2010 RV)Ngjarje historike, që ia arriti plotësisht qëllimit”: kështu
e quajti Papa shtegtimin e tij të fundit apostolik në Qipro, gjatë audiencës së përgjithshme,
mbajtur në Sheshin e Shën Pjetrit, në Vatikan. Ati i Shenjtë ia kushtoi katekizmin
etapave të ndryshme të shtegtimit, nga takimet ekumenike, tek ato baritore; nga përgatitjet
për Sinodin e ardhshëm të Kishave të Lindjes së Mesme, tek thirrja drejtuar të krishterëve
për të mos ikur nga trojet e tyre. Duke kujtuar këto etapa, Papa theksoi edhe qëllimin
kryesor të këtij shtegtimi: e vizitoi Qipron, që ta përforconte në fe grigjën e vogël,
por plot gjallëri, të katolikëve në ishull. Çasti kulmor i shtegtimit ishte ai i
dorëzimit të Instrumentum laboris, për Sinodin e vendeve të Lindjes së Mesme, të cilat,
tha Papa, zënë një vend të posaçëm në zemër të Kishës. Kujtoi edhe thirrjen, bërë
mbarë katolikëve, që të mos i lëshojë zemra përballë vështirësive e të mos tundohen
për të marrë udhët e mërgimit por, me praninë e tyre, të jenë gjithnjë e për të gjithë,
shenjë shprese.
Pas Tokës së Shenjtë vitin e kaluar e Maltës, dy muaj më parë,
Papa shkeli, tani, në trojet e Qipros. Vizita apostolike e fundjavës së kaluar në
Ishull, i krijoi Benediktit XVI mundësinë t’i shtojë gurë të rinj, mozaikut të shtegtimit
të tij në viset ku u shkruan faqet e para e kryesore të historisë së Kishës. Ngrohtësia
e gjallëria e pakicës katolike dhe përzemërisa me të cilën kjo pakicë e priti Kryebariun
e vet, e prekën thellë në zemër Papën, që në kremtimin e parë ekumenik. Ndërmjet gërmadhave
arkeologjike të Pafosit të lashtë, në një atmosferë që, vërejti, të dukej si sintezë
e prekshme e dymijë vjetëve të historisë së krishterë, përsëritëm vëllazërisht impenjimin
reciprok ekumenik, pa kthim mbrapa, ndërmjet armenëve, luteranëve, anglikanëve e,
sidomos, shumicës ortodokse, tejet të lidhur me realitetin e Qipros: “Kjo
rrënjosje në traditë nuk e pengon Bashkësisë ortodokse të impenjohet me vendosmëri
në dialogun ekumenik, njëzëri me bashkësinë katolike, të dyja palët, të frymëzuara
nga dëshira e sinqertë për të rikrijuar bashkimin e plotë e të dukshëm ndërmjet Kishave
të Lindjes e të Perëndimit”. Tema të ndryshme, por me të njëjtën rëndësi,
u prekën një ditë më pas, para presidentit qipriot dhe autoriteteve, në Nikozi, ku
Papa theksoi se mundi të ripohonte: “Rëndësinë e themelimit të ligjit
pozitiv mbi parimet etike të ligjit natyror, me qëllim që të promovohet e vërteta
morale në jetën publike. Ishte një thirrje, që i bëhej arsyes, bazuar mbi parimet
etike e ngarkuar me kërkesa të ndërlikuara për shoqërinë e sotme, e cila shpesh
herë nuk i njeh më themelet e traditës së vet kulturore”. Kujtimi i Benediktit
XVI u ndal, pastaj, tek takimet me katolikët e ritit maronit e të ritit latin, tek
përvoja, zelli e roli i tyre në veprimtarinë bamirëse, në nivel shoqëror, që Papa
pati rastin ta shikojë nga afër. Benedikti XVI theksoi se hyri, me emocion të thellë,
në shpirtin e Kishës maronite, duke pasur parasysh sidomos, grupin e besimtarëve,
që jeton në veri të Qipros, kontrolluar nga turqit: “Ishte posaçërisht
domethënëse prania e disa katolikëve maronitë, që jetojnë në katër fshatra të ishullit,
ku të krishterët janë popull që vuan, që pret, që shpreson: u shpreha gjithë mirëkuptimin
tim atëror, duke i njohur mirë shpresat e tyre, por jo më pak, edhe vështirësitë (…).
Të gjithë, latinë e maronitë, i sigurova se do t’i kujtoj vazhdimisht në lutje, duke
u dhënë zemër ta dëshmojnë Ungjillin edhe përmes një pune durimtare për krijimin e
frymës së respektit të anasjelltë ndërmjet të krishterëve e jo të krishterëve, për
të siguruar paqen afatgjatë e harmoninë ndërmjet popujve”. Një paqe, që
nuk mund t’i përjashtojë të krishterët e të gjitha zonave të Tokës së Shenjtë, të
cilëve Benedikti XVI u bëri thirrje: “Pavarësisht nga provat e mëdha
dhe vështirësitë e mirënjohura, të mos dorëzohen përballë shqetësimeve e të mos tundohen
për të nisur udhën e mërgimit, sepse prania e tyre në zonë, përbën një shenjë të
pazëvendësueshme shprese. I sigurova ata, e sidomos meshtarët e rregulltarët, se nuk
do t’u mungojë kurrë solidariteti i përzemërt e i thellë i mbarë Kishës, ashtu si
edhe lutja e vazhdueshme, që Zoti t’i ndihmojë për të qenë gjithnjë prani frymëzuese
e paqëtuese”. Papa e përfundoi audiencën, duke kujtuar Meshën solemne të
6 qershorit, gjatë së cilës u dorëzoi Instrumentum laboris ipeshkvijve, që në tetorin
e ardhshëm do të jenë në Vatikan, për të marrë pjesë në Sinodin e Kishave të Lindjes
së Mesme: një zonë, ritheksoi Papa, që zë vend të posaçëm në zemrën e Kishës e së
cilës, pak ditë më parë, iu mbyt brutalisht një nga barinjtë: “Së
bashku u lutëm për shpirtin e të ndjerit ipeshkëv, imzot Luigji Padoveze, kryetar
i Konferencës ipeshkvnore turke, vdekja e papritur dhe tragjike e të cilit na tronditi
e na hidhëroi pa masë”. Ndërmjet përshëndetjeve të shumta në gjuhë të ndryshme,
në përfundim të katekizmit, është për t’u kujtuar ajo, që Benedikti XVI u drejtoi
besimtarëve polakë, të cilët i ftoi t’i luten për ndërmjetësim të Lumit të tyre të
ri, don Jerzhi Popielushko, posaçërisht, kujtoi, të gjithë polakët që vuajnë nga përmbytjet
e edhe ata, që nuk ua kursejnë ndihmën. Më pas, si foli për Kapitullin e përgjithshëm
të Misionarëve të Afrikës, të njohur me emrin “Etërit e Bardhë”, Papa ia kushtoi mendimin
e fundi, festës së Zemrës së Krishtit, që do të kremtohet pasnesër e që do të shënojë
edhe përfundimin e Vitit Meshtarak, në praninë e mijëra meshtarëve.