Shpërthim sot paradite në Stamboll. 15 të plagosur. Turqia dhe Rusia marrëveshje në
fushën bërthamore.
(08.06.2010 RV)Një bombë shpërtheu sot paradite në Stamboll duke shkaktuar
15 të plagosur. Ndër ta ka policë që po udhëtonin në automjetin e tyre por edhe kalimtarë
të rastit. Ngjarja ndodhi pikërisht kur po nënshkruhej marrëveshja ndërmjet Turqisë
dhe Rusisë për bashkëpunim në fushën bërthamore. Marrëveshja në fjalë u nënshkrua
nga përfaqësues të Agjencisë Për Energjinë Bërthamore turke (Taek) dhe shërbimi federal
rus për mbikqyrjen Ekologjike, Teknologjike dhe bërthamore. Takimi kryesohej nga kryeministri
turk Erdogan dhe ai rus Putin. Marrëveshja parashikon shkëmbimin e informacionit
dhe teknikave për impiantet bërthamore. Po pikërisht, tema bërthamore të kujton luftën
që po zhvillohet ndërmjet bashkësisë ndërkombëtare dhe Iranit. Ndërkaq kryeministri
rus Putin, nga Stambolli, lajmëroi se “në fakt është arritur” një marrëveshje për
një projekt-rezolutë që parashikon sanksione kundër Iranit për programin bërthamor
dhe nënvizoi se “nuk duhet të jenë masa të tepruara”. Pesë vendet me të drejtë vetoje
në OKB (SHBA, Britani e Madhe, Franca, Rusia dhe Kina) kanë rënë dakord që më parë
për tipin e rezolutës që do të hidhet në votë. Disa vënë në dukje se përveç Brazilit
edhe Turqia e Libani, përfshirë në krizën e Lindjes së mesme, do të votojnë kundër
rezolutës ose do të abstenojnë. Tashpërtash dihet vetëm deklarata e presidentit iranian
Ahmadinexhad: “po qe se miratohen sanksione ndërkombëtare kundër Iranit, atëherë nuk
do të ketë më negociata për çështjen bërthamore.”